فقرة طفلي الإستثنائي
أجا اليوم لي كانت عم تستناه قالولها انت حامل .. فرحة ما بعدها فرحة مر الوقت .. حمل صعب بس كله بهون كرمال البيبي لي جاية كل يوم كانت تسرح بخيالها.. تتخيل شكله شو حتسميه وصلت بخيالها للجامعة لي حيدرس فيها أجا اليوم الموعود ورزقت ببيبي بجنن .. ما شافت متله بجماله وصار حياتها كله ورغم عذاب الرضاعة وعدم النوم كله كان بهون بضحكة وبسمة منه .. وكبر وصار عمره سنة واحتفلت بعيد ميلاده الاول .. بس دقيقة شو عم يصير صارت تلاحظ تصرفات غريبة على ابنها .. يا الله ابني ليش ما عم يلعب مع باقي الولاد ابني وقت بناديله ما بيلتفت .. كأنه مابيعرف اسمه في شي غريب ..وبالرغم انه كل الناس لي حواليها كانوا يطمنوها انه لا تخافي بكرة بيصير .. بس هي أم وقلبها ما كان عم يهدا من الخوف والقلق .. وقررت تروح لعند دكتور الاطفال المختص وتحكيله .. وبعد فحوصات وأسئلة ولعب بأعصابها ... فات الدكتور لعندها واطلع فيها وقلها .... اسف بس ابنك معه توحد ... لا الله يوفقك يا دكتور .. يعني ابني مريض!!؟ قول غير هل الحكي .. هز براسه وقلها اسف .. رجعت على البيت وصارت تبكي وتبكي وعبت الدنيا كله بكي .. كل شي رسمته لأبنه دمر بلحظة اكتأبت ماعاد في شي قلو طعمة بهل الدنيا .. بعد كم يوم فاقت بنص الليل فاتت لعند ابنها .. وشافته عم يضحك وهو نايم .. طلعت عليه وقررت تغير حياته وحياتها .. فتحت الابتوب وبلشت دور وتقرأ مقالات كانت متل اغلب النساء ببلادنا ما عندا اي معلومات عن المرض .. وانصدمت انه هو مرض صح بس يمكن علاجه مع الوقت والاصرار.. صارت تحضر دورات تدريبة وتشارك عائلات عندها نفس الأطفال .. واكتشفت انه اغلب عظماء العالم متل بيل جيتس وانيشتاين ونيوتن معهن صفات توحدية وأهم اكتشاف وصلتله طفلي مو مريض انا طفلي طفل مميز وهي نعمة رب العالمين رزقها ياها ...
يتبع .......... بداية تبحرنا مع أطفالنا الرائعين الذين يعانون من التوحد والوقت سيثبت لنا أنهم فعلا متميزين ..
ولاء دركل
