مذكرات عائلة 3 .
" كرم "
" حياة الكبار مو حلوة .. مو ممتعة.. ليه بابا و ماما عصبو عليي .. شو فيها لو يجو بابا و ماما و غزل و تيتة كمان و يقعدو معي فوق الخزانة و نشوف الألعاب من فوق و نطير عالتخت و نستمتع ☺ ؟
كيف بيستمتعو بنشرة الأخبار ؟ ليه بيضحكو على شغلات ما بتضحك ؟
ليه منحكيلهم شغلات بتضحك كتييييير كتير و ما بيضحكو ؟
طيب إذا بيحبوني ليه عم يعصبو عليي و يخانقوني ؟
بابا بيحب حلا أكتر مني.. حلا بتشاغب و بتخرب أغراض البيت و ما بيعصبو عليها.. أكيد بيحبوها أكتر.. حلا بتضحكهم أكتر مني
بس أنا حياتي ممتعة أكتر منهم.. لأنهم ما بيضحكو كتير و لا بيلعبو
أنا لما صير كبير ما رح صير متلهم... و لا شوف الأخبار المملة "
حالة سكووت و قائمة طويلة من الأسئلة بتدور براس الطفل بعد كل خناقة إذا كانت مجرد تحذيرات و عتابات بالصوت العالي.. لو دققنا شوي رح نشوفها بعيون أطفالنا لما تسرح و تتأمل و تضيّع الجواب عن هالأسئلة
راجع كرم الشاطر لغرفة الجلوس بشفة مقلوبة و عيون سارحة من دون تركيز.. ليحصل الموقف اللي خلى أيمن يفقد آخر حبتين رواق باقيين عنده لليوم!!
بحركة طائشة بيقلب كرم ابريق العصير على كللل الطاولة اللي كان عليها موبايل أيمن لتخليه ينننفجررر و يصرخ بأعلى صوته على كرم!!
" وين عيونك !!! ؟... كم مرة نبهتك ما تقرب جنب الابريق!! و لا تطلع لمكان عالي !! مع مين حكيت أنا !!؟ مع الحيطان !! "
ركضت بسرعة متل اللي عم يركض ليطفي حريق.. اخدت الموبايل فورا و حاولت نشفه و نظفه من آثار العصير.. و هدّي أيمن.. طوّل بالك.. الموبايل ما تخرّب.. بدّل تيابك.. رح نظف المكان و خلص كأن شيئا لم يكن..
مع انو أنا اللي لازم ازعل لأن طلعلي شغل إضافي.. رح ساويه سواء كنت بحالة غضب أو رضا.. حليها يا ريحان ببساطة و هدوء لأن الغضب بعمره ما حل مشكلة..
دخلت لعند أيمن اللي بدأ يهدى شوي.. " أيمن حبيبي بترجاك روق.. كرم ما كان قاصد.. حرام عيونه البكيانة طفل صغير بيخطئ التقدير ، يمكن غلطي أنا حطيت الابريق بطرف الطاولة و أي حدا بيمر كان ممكن يكسره من غير قصد.. تخيل لو ماما أو أنا اللي سرحت و كسرته.. رح تغضب نفس الغضب؟
بسيطة.. بتحصل بكل بيت.. كرمالي ضمه و اعتذر منه قلو انك ما تحملت و عصبت و رح ننتبه أكتر بالمرة الجاية "
ــ و بنبرة استهجااان " اعتذر منه؟!! أنا اعتذر منه؟ !!
و شو رأيك اطلب رضاه صبح و مسا ؟؟! و بوس إيده قبل ما نام؟؟!!
ريحان.. هي مثاليات التربية الحديثة أنا ما بتعجبني.. خليها الك
ــ " مين قال تربية حديثة ؟! أبداً
هي تربية قديمة.. و كتيير قديمة.. تربية نبوية رحيمة حكيمة بتصنع الإنسان...و بتخليــــ" بيقاطعني و بيقول " تعالي علميني كيف التربية الحكيمة.. يلا سمعيلي دروس التربية اللي سمعتيها بالنت!! "
يبدو الحوار مع بقايا الانفعال متل النفخ عالجمرة بيزيدها اشتعال..
" روح وصّل ماما للبيت ما بدها تتأخر.. و لما ترجع منحكي "
ماما حبيبتي.. كنت بتمنى يكون نهارك معنا أحلى.. حقك علينا.. :/
ــ" يا بنتي هدول أطفال بدهم صبر كتير و طولة بال.. انتي و زوجك ياما كاسرين كاسات و مخربين غراض بصغركم.. روّق يا أيمن.. عالطريق رح احكيلك عن عمايل ريحان لما كانت صغيرة و عن مقالبها و فصولها "
و بابتسامتها المعدية اللي بتخلي كل الوجوه حواليها تبتسم..☺ ودعنا التيتة مع ألف سلامة
و هلأ صار الوقت اللي بسميه " وقت الجهاااد في سبيل الله "
وقت التدريس و كتابة الواجبات.. وقت ضبط النفس مع حرق الأعصاب
معلمين المرحلة الابتدائية بتستحقو وسام شرف على صبركم
يتبع...
نور الأشقر
