مذكرات عائلة . 12 .
يلا بسم الله..
ابدا النهار من أوله و اعمل تنظيفة للبيت غير شكل قبل حفلة كرم..
الليفة و الصابون و المطهر و المريول بانتظاري..
و حلا لسه نايمة..
مااا في أحلى من النظافة و روايحها..
صبح و بركة مع صوت العصافير بديت اخلص مكان ورا مكان
عم حاول اتذكر وين كنت مخبية غراض الزينة..؟
يمكن على رف خزانتي..
اخدت البوكس من الرف و دوّرت بقلبه ما لقيتهم :/
بتكوني عم تدوري على غرض ما بتلاقيه و بيطلع بدالو عشرة.. :/
اوووه شو هدول
طلعت بإيدي صور قدييييمة و ذكريااات
ضحكت على شكلي هون كيف طالعة و شعراتي منكوشين
دفتر ذكريات رفقاتي بالمدرسة.. جامع من كل وحدة منهم كلمتين.. الله أعلم كل وحدة منهن هلأ وين بتكون.. صارت أم و لا لسه..
رسالة اعتذار من معلمتي بالابتدائي ..
ااه من ذكرى هالرسالة..
صارت حادثة سرقة فلوس لأحد المعلمات وقتها.. و اتهموني فيها ظلم لانهم شافوني دخلت عالصف لحالي..
عزلوني عنهم و لا رضيو يسمعوني.. لحد ما انكشفت الفاعلة الحقيقية بتدبير من الله ما بيخطر عالبال..
كانت هالمعلمة تحط إشارة صغيرة على ورق الفلوس بتاريخ استلام راتبها.. و توقع عليها..
و البنت سرقت الفلوس و اشترت فيهم حلويات من بوفيه المدرسة.. مسؤولة البوفيه شافت الفلوس و عرفت التوقيع لرفيقتها المعلمة صاحبة هالعادة..
اخدو البنت للإدارة و اعترفت بكل شي..
و جابوني ليعتذرو مني على ظلمهم و سوء ظنهم..
الحادثة صارت و أنا طفلة و غصتها بحلقي باقية لليوم..
طيب خلينا نفترض انو كنت فعلا أنا اللي سرقت...
كيف بيكون الحل ؟ شو العقاب المناسب ؟
اني اتشهر عالعلن و الصوت العالي قدام الطالبات و ينقال هي السارقة لا تقربو عليها ؟ انو تغيرو مكاني و تحشروني بزاوية الصف.. ممنوع شارك.. و ممنوع احكي؟
الطفل تجربتو بالحياة جديدة.. ممكن لسوء تقديره و قلة علمه انو يكذب أو يسرق أو يخادع..
مفروض العقاب يكون للتربية مو للتدمير و الانتقام..
بدو توعية و ترغيب كتير لحتى يعتدل و يصير هو من حاله يكره السرقة و الكذب..
هاد لو كان فعلا مخطئ .. كيف لو كان بريء؟
الطفل صفحة بيضا مفتوحة.. كل شي منكتبه فيها رح يبقى معه لآخر يوم بحياته..
اديه لازم نحذر.. و نحسن الكتابة..
ماما... ماما... حلا الأمورة فاقت :)
طويت الدفتر.. و طويت معه هالذكرى
و قمت لاكتب بدفتر ولادي أحلى الذكريات ..
يتبع..
نور الأشقر
