مذكرات عائلة ١٨

 مذكرات عائلة  18 . 

نازلة عالسوق معبية جزداني و حاسة بالثقة اني رح لاقي طلبي و ارجع معي زيادة كمان 

بنوتتي غزل حابة تشتري بيت للعباتها الباربيات

ما بعرف شو القصة :/

نمنا فقنا لقينا الدنيا غليانة و الأسعار مرتفعة 

يا لطيف من اسبوع واحد ما كانت الأسعار هيك 

الله يعين المحتاج.. بيتطلع بعيون ولادو و مو قادر يأمنلهن يا دوب حاجاتهم الرئيسية 

يا رب يا رزاق يا كريم تكون بعونهم 

تطلعت بالقائمة اللي بإيدي و بديت اختصر الشغلات اللي مو كتير ضرورية..  بسيطة بتتأجل 

و مشان غزل.. رح نعمل أحلى بيت للباربي بإيدينا

من كرتونة كبيرة و شوية تفاصيل ☺☺

رح خليها لبعد الامتحانات حتى ما تتلهى فيه 

خلص مشوار السوق على بكير كملت اليوم متل العادة و استقبلت روان لدرس اليوم  

كنت مسرورة انها بدأت تتعود علينا و تتفاعل معي و تحب المادة.. 

بس اليوم..  ساكتة..  مو متل العادة..  عم تجاوبني بالزور 

بطلب منها تعيد القاعدة.. بتسكت شوي و بعدها بتنرفز و بتقلي 

" ما بدي صير دكتورة!! 

ما بدي صير مهندسة!! 

لشو دراسة العربي لو بدي ادخل فرع علمي؟ 

ليه ماما و بابا بدهم علامات كاملة دائما؟ "

طلبت منها تهدا و نكمل الدرس و بعدها منحكي مع ماما بهالموضوع.. 

عم اقلب الصفحة و إذ بلاقي مرسوم على طرفها قلب كبير مكتوب فيه اسم روان و اسم شخص تاني.. ♥ 

اصفرت البنت و احمرت و تغير لونها و سكرت الكتاب و قالتلي هي رفيقتي يمكن عم تمزح معي 

عرفت ليش البنت عقلها مو معها و ليش تلبكت هالقد .. 

حب المراهقة فايت عالخط.. 

سكرت الدفتر.. 

و قلتلها..

" حبيبتي.. البنت بعمرك بتبدا تتحول من طفلة لصبية.. 

بتفرح بحالها و بجمالها.. يمكن تميل لشب قريب من عمرها من الشباب اللي حواليها.. 

بدي تعرفي..  انو هاد شعور طبيعي.. 

العين ما فيها تشوف شي حلو و تقول مو حلو.. 

مو عيب تشعري بإنك معجبة بشخص معين.. 

بس العيب انك تغلطي.. العيب انك تنقصي من كرامتك.. 

انك تمنحي كلمات و لمسات الغزل لشخص ما بتعرفي لو هو صادق معك أو عم يتسلى

خبرتك بالحياة بعدها صغيرة على قدك 

يمكن ما تكوني محتاجة أكتر من شوية اهتمام و كم كلمة حلوين.. و تكتفي.. 

بس الموضوع عند الشب مختلف..  و مرتبط برغبته الفطرية أكتر.. 

لهيك هالموضوع دائما فيه خطورة

خليكي جوهرة مخباية.. أميرة للصادق اللي رح يلبسها الخاتم و يرفع الطرحة عن وشها الحلو.. 

و يعلن قدام كل الناس اني اخترت حبيبتي من بين كل البنات لتكون شريكة عمري كلو.. اغمرها بالحب و صونها و ارعاها.. 

إياكي تكوني لقمة سهلة لأي واحد بيسمّعك كلمتين حلوين و يدوقك بعدهم طعمة مرة.. 

الحب مو عيب.. 

بس المخالفين مزجوه بالرذيلة و الشهوة و ارتكبو تحت اسمو الطاهر تصرفاتهم البشعة.. ظلمو حالهم و ظلمو معهم أحلى كلمات الدنيا و مشاعر الإنسان.. 

الحب جنة.. و متل الجنة.. ما بيدخلها إلا اللي بيستحقها.. "

دمعت عينها كأن كانت بدها اي حدا يحاكيها عن هالموضوع..  ارتاحت شوي..  و كملنا درسنا.. 

و عرفت انو صار لازمني قعدة رايقة مع امها.. مع صحن ياسمين و فنجان قهوة.. 

نور الاشقر