هدية عيد الأضحى

 عيد الأضحى المبارك لأطفال المغترب 

 دايماً أهل المغترب بقولو ليه ولادنا كتير بحبو أعياد غيرن وبيستنوها وأعيادنا بتمر عادي وما كتير منحس انو بتأثر فيهن .. ولما بيجي عيد الأضحى منقول انو هاد العيد مامنحس فيه ومارح عطل ولادي كرمال مدرستن وهو هيك هيك ما عم نحس بطعم العيد ببلاد غير مسلمة .. 

 مع دخول كنان للمدرسة واول عيد هو رح يكون مو معطل فيه فكرت لوهلة أولى انو ايه مابدي عطلو ويروح عليه بعدا حسيت اني فضلت شي عشي كتير مهم عنا بديننا ولازم ابني يشعر فيه .. 

 رح عطله وانا كتير مقتنعة لأنه لازم يعرف انو هاد يوم عيد وكل المسلمين محتفلين بهاليوم وانت رح تحتفل وتعطل من المدرسة الكل حيروح بس المسلمين لا .. 

ديننا شعائرنا واجب علينا انه نزرعن بأطفالنا وخاصة إذا كانو ببلاد غير مسلمة .. وأي تصرفات صغيرة منا نحن كأهل متل انو شو فيها وهو هالعيد وخلص عيد الفطر عم نحتفل والخ .. 

صدقوني شوي شوي الطفل بيتربى بعيداً عن تفاصيل شعائر دينو .. وبصير مسلم عالهوية ..

 طيب زوجي مو معطل وانا بالبيت شو اعمل لابني ؟

أول شي بلشي حضري مع ابنك نشاطات الحج يلي عرضناها لتوفوتي بالجو منيح واحكي قصة الحج ... وكتير كتير حمسيه ليجي اول يوم وانا حمسته متل مو شايفين بالصور 

تاني شي بهاليوم خلي يفيق يلاقي هدية منك بمكان معين ويعرف قبل كم يوم انو في هدية بأول يوم العيد .. 

أي نشاط مميز انت وياه .. تتغدو برا .. يلعب بمكان هو بحبه .. جمعة انت ورفقاتك وولادن ورسم عالوجه مع العاب للأطفال .. أي شي يخلي هاليوم حلو .. 

 بلشو اليوم بصلاة العيد يلي لازم ابنك يروح عليها خلي التلفزيون عشعائر الحج .. مثلي انت وياه الحج ولو بالمخدات .. خلي يلبس منشفة ويطوف ويسعى .. صوريه افرحي فيه شجعيه .. أكلة حلوة عمليها انت وياه تكون ذكرى حلوة لهاليوم .. 

 صدقيني ابنك رح يفرح بأبسط الأشياء وهو بحاجتك حتى تزرعي فيه كل شي حلو عن دينا  

كل عام وأنتم بألف خير .. 

لا تنسوني من الدعاء في هذه الأيام الفضيلة 

تاغ لرفقاتكن المغتربات لو سمحتوا