زينة العيد

فقرة غرفة طفلي مع ربا الخاني  

 مرحبا عن جديد ....

كيفكم ؟ اتمنى تكون بخير و سعادة .....

ان شاء الله كل عام و انتم بخير بهالأيام الفضيلة و الله يتقبل منا طاعاتنا و عبادتنا

بهالأيام الفضيلة يا رب .....

 اليوم لح تكون جلستنا خفيفة و مرحة كتير ، لأنها لح تحكي عن زينة عيد الأضحى لغرفة الأطفال.

 لاحظت بالجلسة الماضية أنه في من  الأمهات المتواجدات بسوريا صاروا علقوا ( انه ان شاء الله بس تتحسن الأوضاع بسوريا و الله يفرج عنها منبقى من روق لهيك قصص ) هلق الله يفرج عن بلدنا و بعرف كتير من العالم مالون خلق حتى يقولوا صباح الخير بس ولادنا مالون علاقة ليش لحتى ما نفرح قلبون بشي تغيير لغرفتون ، و انا لحد الآن عم احكي عن شغلات رخيصة و في متناول الجميع أنه ينفذوها شغلات بايدك بتقدري تعملي فرق بالغرفة ، مشان هيك اقتراحاتي لزينة الطفل مبنية على توفرها بجميع المكاتب و بأرخص الأسعار و بنفس الوقت انيقة و شيك .

الخامة الرئيسية للزينة هي الورق ..... أنا كتير بحب الورق عالم تاني لزينة طبعا هو بحر من الأنواع و الأشكال في ورق الكتابة العادي في ورق الكونيش الكرتون .....الخ الخ

اول فكرة لح تكون هي الفكرة التقليدية أعلام ملونة :

المواد المطلوبة :

اي نوع ورق ملون

قلم رصاص

مقص

خرازة  

شريطة طويلة لتعليق ممكن تكون حبلة أو شريط ساتان او خيط رفيع حتى  

الطريقة :

بتجيبي ورق عادي ملون و بالقلم الرصاص بترسمي مثلث و بتقصيه

بالخرازة بتخرزي المثلثات الملونة على شريط

طريقة التعليق :

بتكون اما بخرز قطعة مطاط صغيرة بأطراف الحبلة و تعلق على بالطريقة يلي بتحبيها  أو بلاصق العادي تلصق أطراف الحبل

المقترحات : فيكي تقصي من ورق أسود شكل الكعبة و تخرزيها بين الأعلام الملونة ..

الفكرة التانية  مربعات خاروف عيد الأضحى :

المواد المطلوبة :

اي نوع ورق ملون

ستيكرز ( صور) على شكل خاروف

قلم رصاص

مقص

خرازة  

شريطة طويلة لتعليق ممكن تكون حبلة أو شريط ساتان أو خيط رفيع حتى

الطريقة :

- بتجيبي ورق عادي ملون و بالقلم الرصاص بترسمي مربعات و بتقصيه

تلصق الستيكر او صورة الخاروف داخل المربعات

- يثقب كل مربع من الأطراف و يدخل  شريط من اطراف المربع

طريقة التعليق :  

بتكون اما بخرز قطعة مطاط صغيرة بأطراف الحبلة و تعلق على بالطريقة يلي بتحبيها  أو بلاصق العادي تلصق أطراف الحبل أو ربط الشريط من الأطراف بمكان المرغوب للزينة

الاقتراحات : 

ممكن بدل ما تشتري ستيكرز على شكل خاروف ممكن أنت ترسمي الخاروف و تلوين باللون الأسود و داخل بطن الخاروف بتلزقي قطن أبيض مع مساعدة الأطفالك  ، بهطريقة بتستمتعي انت و اطفال بصنع الزينة :)

 فكرة حبل النجوم :

المواد المطلوبة

ورق عادي بس مجرد لونين او ثلاثة فقط على زوقك

قلم رصاص

مقص

اذا تواجدت قطاعة ورق على شكل نجمة

غراء

شريط ساتان أو حبل أو حتى خيط رفيع

الطريقة

نرسم على الورق نجمات بالحجم يلي بتشوفيه مناسب و يقص الورق على شكل نجمة ، في حال تواجدت قطاعة ورق على شكل نجمة أسرع

بالغراء تلصق النجوم على الحبل  

طريقة التعليق :

- منجمعها و منعلقها بشكل نازل من التريا أو من السقف

- ممكن نربط طرف الخير بعامود تعليق تبع البرادي الغرفة و بتنزل النجوم فوق البرادي او تحت البرادي  

اقتراحات :

- ممكن اذا تواجد غليتر ( بريق) فينا بلزيق الأوهو نضيف على النجمات غلتر ( بريق )

- ممكن نضيف مع رسمة النجمات رسمة قمر بحيث يصير عنا نجمة و قمر

 حبال احتفالات الكهربائية :

- ممكن تتعلق بشكل يلي بتحبيه انا بفضلها على شكل قناطر على البرادي او على الجدار

 حبال زينة من ورق الكورنيش او ورق عادي المواد مع الطريقة عن طريق فيديوهات مرفقة مع الجلسة مرفقين مع هذه الجلسة ممكن تختاروا وحدة منها 

https://www.youtube.com/watch?v=05caL1_SRfc

https://www.youtube.com/watch?v=eU-Fj4FgbPg

https://www.youtube.com/watch?v=h1xWUzdgnR8

 ممكن تخصيص مكان

 صغير لزينة العيد نصنع فيه مع الأطفال مجسمات عن الخاروف و الكعبة  

مع زينة على هاد الجدار تكون صغيرة و متواضعة  فينا نحط فيه هدية العيد كمان ، في حال ماكنت الأم لديها الرغبة بتزيين غرفة الأطفال كلها

 للأسف وقتنا لليوم خلص ، انشاء الله تكون الأفكار عجبتكم و كل عام و انتوا بألف خير بمناسبة عيد الأضحى المبارك أعاده الله علينا و عليكم باليمن و البركة .

بتمنى تصوروا زينة الغرفة و تبعتوها :) بتعليقاتكم حتى لو لما كانت من الأفكار يلي اقترحتها لنفرح معكم و تفرحوا معنا  .

.

كل عام و انتم بالف خير .

كانت معكم المصممة ربا الخاني