مذكرات عائلة 22

مذكرات عائلة بقلم نور الأشقر    . 22 .

عم نظف الحمامات و فكر بتنظيف حلا..
يا الله هالمرحلة شو منحمل همها و منستتقلها

أول ولد..
غالبا بيكون أصعب شي
كنت أم جديدة مع بنتي غزل الكبيرة.. و خاف و اتلبك على أبسط المواقف..
و المهمات الكبيرة كنت حسها أصعب شي بعملو بحياتي
متل الفطام.. و التنظيف.. الاستغناء عن البامبرز..

و مرة كنت بجلسة ستات..  كل وحدة فيهم عم تعرض شطارتها و ذكاءها و طرقها المميزة لعملية التنظيف..

الكلام اللي حكوه حسسني اني قاعدة مع نتنياهو و هتلر و ستالين  مو مع أمهات حانيات رؤوفات بأطفالهن..

وحدة تقول و الله بكل مرة ابني يعمل فيها عالأرض.. خوّفه بالكبريتة.. بشعلها و بقربها من مكان التبول و بهدده لو عادها شو رح يصير..

و تانية تقول لاا أنا بحطله فلفل بيخليه عم يتذكر انو يا ويلك تعيدها..
و تالتة حماتها بتسخر منها و من كسلها و انو ليه لهلأ ابنك ما نظف؟  اي و الله انا كل ولادي عالسنة و نص كانو نظفانين :/ بمجرد قرصة قوية على مكان التبول.. يسمعو و يطيعو..

يومها أنا الكبيرة خفت من هالوسائل الإرهابية .. فكيف الطفل الصغير..؟!!

تمنيت لو يخترعو شي دوا.. نعطيه للولد و يصير لحالو يقدر يتحكم بنفسه بدون هالعذاب..

و عن جد..  بحكم زوجي صيدلي.. خبرتو اني هيك سمعت و يا ترى ما اخترعو دوا يساعدنا بهالمهمة؟

ضحك و قلي..
هالمرحلة دواها هو.. الصبر..
خبرني انو لكل طفل قدرة معينة عالتحكم بالعضلة اللي بتسكر مكان التبول و بتفتحه.. مجرد فرق مرونة و تحكم..

في أطفال بشوية تدريب بيتمكنو من نفسهم بسرعة..
و في أطفال بياخد معهم التدريب وقت أطول ليكبرو شوي و تنضج هالعضلة أكتر ليقدرو يتحكمو فيها..
لهيك في ولاد بيستغنو عن البامبرز قبل السنتين و ولاد بيضلو للسنتين و نص و يمكن للثلاثة..
لهيك لا تقارني أبدا بين ولادك و لا بينهم مع ولاد الآخرين

قلي.. ابدي مع الطفل بوقت مبكر بإنك تكرهيلو يعمل بالبامبرز.. لتبدا الفكرة عندو ترسخ بإنو هاد شي مكروه

و بعدها كل فترة بتاخديه للحمام ليعرف وين المكان المناسب لقضاء الحاجة..  بدون ما تفكيله البامبرز..

و بعد فترة بتبدأي بمرحلة فك البامبرز و تاخديه للحمام بأوقات متقاربة أكتر..
و هون طبعا لااا بد من الصبر لأن لااا بد رح يوسخ الأرض او الكنبة.. لبين ما يتعلم و يتحكم تمام..

و إياااكي إيااكي تعاقبيه أي عقاب أثناء هدول المراحل
ممكن تتسببيلو بضرر نفسي كبير و تاخدي نتائج عكسية..
بعض الأطفال من شدة العقاب و الرعب بيضلو عاجزين عن التحكم بعضلتهم لوقت طويل.. و بتدخلهم بمشاكل التبول اللاإرادي الليلي..

بعد ما يتمكن تمام.. و يخبرك بكل مرة بدو يدخل فيها للحمام..  و يصير أحيانا بعدها يتجاهل نفسو لأنو مشغول باللعب أو بالضيوف..
هون ممكن تختاري طريقة عقاب مقبولة.. ليعرف انو هو غلط و هالغلط مو لازم يتكرر..

أما وسائل التخويف و الترهيب بهالشكل.. ما رح تجيب إلا الضرر سواء أثناء التدريب أو بعده ..

ساعدني أيمن الحمد لله لتجاوزت مع غزل و كرم هالمرحلة ..
و هلأ دووور حلا  بالشتا صرت ارمي هالمهمة عالصيف مشان غلبة تنظيف السجاد..  و بالصيف عم أجّل و سوّف لبعد الامتحانات و لبعد رمضان..

بس خلص لازم حدد يوم البداية بحزم و اخلص من هالمهمة..  إنجازها كان يفرحني أكتر من فرحي بشهادة البكالوريا

رن الجرس.. فتحت.. هي روان بنت جارتنا.. حاملة معها علبة صغيرة
" خالة..  من شوي رجعت من امتحان العربي و الحمد لله قدمت منيح..
فرحانة بالشغلات الحلوة اللي تعلمتها منك و بإنك حببتيلي المادة و ساعدتيني فيها ..
و حابة اهديكي هدية صغيرة..  هاد صندوق اكسسوارات صغير اشتريته لما كنا بفرنسا.. منقوش عليه برج إيفل بطريقة حلوة.. "
يا حبيبتي أكيد منك هدية بتجنن.. و رح احتفظ فيها ذكرى حلوة من صبية أحلى

و انشالله النجاح رفيقك دائما..
و رفيقي كمان

يتبع...

نور الأشقر