كيس الشاي الطائر
اليوم جاييتكون بتجربة غييييير شكل ، و بأكدلكون بعد ما تساووها رح تسمعوا كلمة ..ماما كمااااااااان... ماما مرة تانية.... ماما الله يوفقك خلينا نعيدا
تجربة حلوة و مبهرة للكبار قبل الزغار
يلي منحتاجو بسيط و متوفر بكل بيت
كيس شاي
مقص
ولاعة (التجربة لازم تكون بحضور أحد الوالدين )
الخطوة الاولى هي قص كيس الشاي من فوق
الخطوة التانية منفضي الشاي ب صحن صغير (لا تكبوا الشايات بس تخلصوا التجربة شربوا كاسة شاي ع رواق )
الخطوة التالتة رح نحاول نوقف كيس الشاي الفاضي ع صحن بشكل عامودي .
الخطوة الرابعة و الأخيرة بالولاعة منحرق طرف كيس الشاي ..و المفاجأة بعد احتراق تلت ارباع الكيس تقريباً حنلاقيه طار بالسما و ارتفع لفوق و ارتفعت معو ضحكات الولاد و اصواتون
كيف و ليش
التفسير بيختلف باختلاف عمر الطفل .
الهواء الساخن يتصاعد للأعلى
لما حرقنا كيس الشاي و سخن الهوا من حوليه تصاعد الهواء الساخن لفوق و حمل معو كيس الشاي الخفيف .
ممكن نذكر الأطفال كيف المنطاد بيرتفع لفوق عن طريق تسخين الهوا من جواته ..
لا تنسوا تغلوا الشايات
بتمنى تكون التجربة عجبتكون و تشاركونا ب ردة فعل اطفالكون
داليا المصري
