اليوم الأول رمضان 2017
قصة اليوم
أصحاب الكهف
قصة اليوم نذكرت بالقرآن الكريم وفي سورة بالقرآن كاملة على اسمها وهي سورة الكهف ..
كان يا ماكان بقديم الزمان بوقت كتير بعيد وقبل ما يجي الاسلام ..
كان في مجموعة من الشباب بعيشوا بقرية أهلها بيعبدوا الأصنام وبدافعو عنها وكان حاكم هالقرية كتير كتير ظالم وأي حدا بخالف رأيه ممكن يأذيه لمجرد انو خالف رأيه وماحكا متل مابدو ..
هالشباب هدول كانوا دايما يفكروا .. معقول نحن بدنا نعبد حجر ؟ كل هالدنيا هي الشمس والقمر والسما وكل شي حوالينا معقول الصنم هو يلي خلقن ؟ طيب كيف وهو حجر ؟ كانو يحسو انو يلي خلق هالدينا هي ويلي خلقنا اكبر من هالحجارة العاجزة هي .. وهيك صاروا يآمنوا انو يلي خلقنا هو اله اكبر واهم من هالحجارة .
بالبداية كانو يفكروا بهالشي ويحكوا بيناتن هالافكار بالسر لانه اذا حدا سمعن من الناس رح يأذيهن بس كمان قرروا انو ما يسجدوا لهي الأصنام ابدا ابدا .. وكمان قرروا انو يحاولو يقنعوا اهل القرية انو هالاصنام هي حجارة فقط مالا اله .. كان الموضوع خطر عليهن بس حسوا انو لازم يحاولو ورح يتحملو اي اذى رح يصيبن بهدف يهدوا الناس للحق .. وحسوا انو الله معن ورح يحميهن اكيد .. وفعلا بلشوا يحكوا مع اهل القرية يلي فورا وصلو كلامن للملك الظالم ..
لما سمع الملك عنن قرر انو يقتلن فورا ..
طيب شو الحل ؟؟ يضلو قاعدين بهالقرية ويخلو الملك يقتلن ولا يفكروا بحل ؟؟
اكيد الاستسلام مو حل ابدا .. لهيك قرروا انو يهربو من هالقرية وويروحوا لمكان يعبدوا الله فيه بدون ما حدا يأذيهن ..
فالله سبحانه وتعالى هداهم انو يروحو على كهف بعيد شوي عن القرية يتخبوا فيه .. وصار اهل القرية يدوروا عليهن بس الله حماهن خلى اهل القرية يدوروا بكل كل مكان عدا هالكهف ..
اول ما وصلوا للكهف استلقوا عالارض ليناموا ويرتاحوا شوي ومان معن كلبن ..
وهوووون صااااارت المعجزة الالهية ..
ويلي هي انو الله سبحانه وتعالى نيمهن اكثر من 300 سنة .. ايه 300 سنة بتتخييل شو يعني 300 سنة ؟؟ نيمهن هنن و الكلب تبعن ..
وبهي المدة كانو نايمين عادي متل اي انسان نايم طبيعي .. كان الله سبحانه وتعالى يقلبن عاليمين والشمال حتى اجسامن ما تتعفن وكمان جعل الله اشعة الشمس القوية ما تجي عليهن حتى ما تحرقن ..
وبعد 300 سنة .. 300 سنة قرر الله سبحانه وتعالى انو يفيقوا .. واول مافاقوا حسوا انو هنن كانو نايمين يوم واحد او يومين بس ابدا ما حسوا انو هنن صرلن زمان نايمين ..
كانو كتير جوعانين وقت فاقوا .. لهيك راح واحد منن معه مصاري حتى يجيب اكل .. ووقت نزل من الكهف وقرب عالناس صارت الناس تتطلع فيه باستغراب .. لانه شكلو غريب واواعيه قديمة كتير حتى المصاري يلي بايدو كتير كتير قديمة .. وهو كمان كتير استغرب القرية اتغيرت والناس غير الناس يلي بعرفن حتى لباسن مختلف وحتى البضاعة مو نفسها .. ماكان بيعرف انو الملك الظالم مات وانو اجا بداله ملك صالح ..
رجع عالكهف خايف والناس كمان كانو بدن يعرفو شو قصة هالشب لحقوا وصلو عالكهف وشافوا هالمعجزة الالهية ..
بعد هالمعجزة ماتوا الشباب .. وبهالمعجزة كل الكفار عرفوا انو الله قادر على كل شيء وانه اذا اراد شيئا يقول له كن فيكون .
مكان الكهف غالبا بالأردن ..
كم شب كانو مو مهم المهم نعرف القصة والعبرة منها ..
كم شب كانو مو مهم المهم نعرف القصة والعبرة منها ..
نشاط القصة :
ارسم رسمتين من خيالك لأصحاب الكهف وحدة قبل السبات والتانية بعد وكيف حيكون شكلن
اكتب على ورقة رقم 300 ولونه ولا تنسى انو أصحاب الكهف ناموا اكتر من 300 سنة
قصة اليوم هي معجزة صارت قبل الاسلام .. واخر معجزة كانت من الله سبحانه وتعالى هي القرآن الكريم ..
