قصة أصحاب الأخدود

#اليوم_العاشر_رمضان2017

 قصة اليوم 

 قصة أصحاب الأخدود 

كان يا ماكان بقديم الزمان وقبل الاسلام ما يجي وقصتنا اليوم صارت بوقت كان فيه الدين المسيحي .
كان في مدينة ملكها كافر وكان ظالم كتير ...كان يدعي أنو هو الاله وكان عندو ساحر يعتمد عليه بكل الأمور بس الساحر كان كبير بالعمر وحس أنو هو لازم ينقل العلم اللي بيعرفه لشي حدا قبل مايموت .
فالملك جاب غلام من المدينة وقله أنو لازم كل يوم يروح يعد عند الساحر يتعلم منه السحر ..
وفعلا صار الغلام يجي عالقصر كل يوم عند الساحر ليتعلم منه بس وهو ماشي بالطريق كان يشوف راهب (رجل متدين مسيحي كان هاد هو الدين قبل الاسلام )
وصار يعد يستريح عنده بنص الطريق ويسمع كلامه
اتعلق الغلام بالراهب وأعجب بحكيه كتير وصار كل يوم يعد عند الراهب و يوصل متأخر على الساحر احيانا والساحر يخانقه ويضربه لأنه عم يتأخر عن موعده .
قام الغلام قله للراهب أنو مابقدر اتأخر عندك لأنو الساحر عم يضربني فقله الراهب اذا أنت خايف من الساحر قله أنو أهلي السبب وازا خايف من أهلك قلن أنو الساحر هو السبب.
الغلام كان دايما يفكر انو الملك مو اله وهالكلام غير منطقي كان يحس انو الاله اكبر واحسن من هاد الملك الظالم .. دايما كان يدعي بقلبه انو يوصل للطريق الصح ويعرف الاله الحقيقي يلي خلقنا ..
يوم من الأيام كان ماشي الغلام بالطريق لقى حيوان كبير واقف ومسكر الطريق ماحدا عم يقدر يمرق فمسك حجر حتى يضرب الحيوان ليبعد ويفتح الطريق وهون فكر قبل مايرمي الحجر بطريقة يعرف من خلالها مين الله الحقيقي بحب اكتر الراهب او الساحر ؟؟
صار يقول يارب اذا كنت بتحب حكي الراهب أكتر من حكي الساحر فخلي الحيوان يموت ورمى الحجر وضرب الحيوان بالحجر ..
ياترى مات الحيوان او لا ؟؟؟ وياترى كلام مين الله بحب اكتر الراهب او الساحر ؟
انتظرونا بكرا لتعرفوا كمالة القصة

نشاط القصة 

رسم تخيلي للغلام والراهب والساحر والملك الظالم
 قصة اليوم هي معجزة صارت قبل الاسلام .. واخر معجزة كانت من الله سبحانه هي القرآن الكريم .
#للطفولةعنوان
#ولاءدركل