لوحة الخريف

فقرة أيادي مبدعة

                      لوحة الخريف

ومين ما بحب الخريف وألوان الشجر يلي بتتغير و بسقوطا بتعلن عن بداية فصل جديد واقتراب فصل الشتاء يلي يارب يحمل معه كل خير .. 

النشاطات كتيرة كتير وكل يوم ان شاء الله رح نعرض واحد وبتمنى انو تجربو شي مع أطفالكم لأنه أنشطة الخريف من أجمل الأنشطة للطفل.

بلشنا نشاطنا بتمشاية حلوة وكيس صغير حتى نجمع أوراق سقطت حبينا نتعرف عليها و نصير اصدقاء  

وطبعاً  أسئلة كتيرة سألتا لكنان أثناء جمع ورق الشجر ..  كيف سقطت ؟  ليه اتغير لونا ؟ طيب شوف في أوراق قاسية وفي أوراق طرية  شو السبب ؟

بتقدر تعد كل الأوراق يلي بالأرض ؟

كان الجواب طبعا وبلش عد ..  طيب بتقدر تعد كل الاوراق يلي بالشارع كله؟  صفن شوي وبدو يعمل بطل بس فوراً أتراجع وقلي شوي صعبة ..  قلتلو بتعرف أنو الله سبحانه وتعالى بيعرف قديه عدد كل الأوراق يلي تساقطت عالأرض وبكل العالم ؟ الله بيعرف ورقة ورقة انها عم تسقط بكل مكان .. 

قلي كيف عرفتي؟  قلتلو القرآن كلام الله وقرأت هي الآية( و ما تسقط من ورقة الا يعلمها ) 

انصدم كتير وفكر كتير وسبحنا الخالق العظيم وارجعنا للنشاط

ارجعنا عالبيت وباشرنا بنشاطنا وقبل ما نحكي عن فصل الخريف اتعرفنا على كلمة جديدة وهي السنة ..  شو يعني سنة؟ يعني كتير كتير ايام ورا بعض ..  طيب كم يوم يعني؟  يعني 365 يوم ..  إذا السنة فيها 365  أو 360 يوم ..  تعا نتخيل انو كل الايام ربيع قديه رح نشتاق للمطر ..  طيب اتخيل لو كلن شتاء قديه رح نشتاق للسباحة والشمس ..  الله سبحانه وتعالى عطانا 4 فصول كل فصل احلى من يلي قبله وهيك الإنسان ما بمل ولا ببتعب شايف الله شو بحبنا ؟ 

بالاعواد الكتيرة عملنا 4 مربعات وحكينا عن المربع وأضلاعه  بعدا كل مربع عملنا لفصل واتذكرنا الفصول واسمائها .. 

وهلا بدنا نعمل لوحة الخريف 

لونا الرز بأربع ألوان ..  أخضر للعشب ..  أحمر أصفر برتقالي للأوراق ..  لونا الرز بمعلقتين مي مع 4 نقط ألوان طعام .. 

نشفنا الرز عالجريدة وصار جاهز للإستعمال .. 

ويا للمتعة يلي شفتا بعيون كنان وكيف لونا الرز وعم نلزقه ..  الشجر استخدمنا أيدينا ويلي اكتشف انو صارو كبار بهالنشاط هههه كان بيلزمنا أصغر  والشمس كورنيش  والغيوم محارم لأنه بالخريف بتنزل المطر .. 

وصار عنا لوحة حلوة علقناها بغرفتنا وكنان طالب انو نعمل  4 لوحات حتى يكون عالحيط 4 فصول ..