يوميات ام

 يوميات أم  

 فقرة جديدة رح تنضاف لبرنامجنا هدفها تبادل خبرات بين الأمهات لما بينحطو بموقف معين مع أطفالهن  منتناقش سوا بهالموقف ومنعرف التصرف الصح من الغلط مع ولادنا 

 كل يوم رح يكون عنا موقف مع طفل مشاكس رح يرافقنا بمشاكله  هههه وسوا رح نتناقش بالطريقة المثلى والتصرف الصحيح يلي لازم نواجه فيه هالموقف 

 رح اقرأ كل التعليقات عالبوست ونهاية اليوم بكتب رأي الشخصي بالحلول المناسبة لهالموقف 

                             موقف اليوم 

بلشت المدارس و ومتلي متل كل أم فرحت بهاليوم العظيم يلي ابني قالي باي ماما وطلع عالباص من غير شر 

بس قبل هالباي هي في معاناة يومية بتبدأ معي من الصبح ,, وقت بدي فيق ابني عمدرسته ,,  يلا ماما قوم ,, صار وقت المدرسة بسرعة غسل فرشي سنانك ,,, خلصت لبس ؟ اسرع يلا يلا يلا بسرعة الله يخليك ,, لا مو وقت تلفزيون ,, بلا حركات ,, رح يجي الباص ,, خلص فطورك ,, يلا باقي 5 دقايق ,, باقي 4 باقي 2 بسررررعة ثواني بيجي الباص 

 وتستمر اسطوانة بسرعة ويلا والخوف من انو يروح الباص وغير نقاش تبع مابدي روح عالمدرسة والسق والنق الصبح  ,

 بحس كل يوم الصبح اني بمعركة معه وبعمل المستحيل حتى انتصر أنا  

كيف وشلون وشو الطرق يلي بتتعاملو فيها مع ولادكن الصبح بحيث يمر وقت الصبح بدون هالعذاب هاد ؟؟ 

تنويه  المواقف المذكورة هي مواقف من مخيلتي 

ولاء دركل  

Photo credit :

Erkan Yilmaz