طفلي الإستثنائي : التوحد ٣

 فقرة طفلي الإستثنائي

 التوحد 

الجزء الثالث 

الأم هي العنصر الأهم في علاج التوحد وهي الخطوة الأولى والأهم في علاجه .. 

 لكن نفسيه الأم تمر بمراحل كتيره 

 المرحلة الأولى : 

بتكون مرحلة صراع داخلي بين انه طفلها طفل طبيعي او مريض وبتصير بتقارنه ب باقي الأطفال يلي من جيله .. و مع الأسف مجتمعنا لا يدعم شكوك الأم بما يخص طفلها كله بيفترض او بيقنعها انها عم نتوهم وانه الولد طبيعي ..

 المرحله الثانية : 

وقت بتتأكد انه طفلها معه توحد بتدخل بحالة الأنكار انه هالحكي مو صحيح و الدكاتره عم يبالغوا ومنرجع كمان للمجتمع لي حواليها بدال ما يهديها ويوقف جنبها بيقنعها انه حكي الدكاتره مو صحيح وانه ممكن بكره بيصير ما أحلاه ..

المرحلة الثالثة :

بتنتهي مرحلة الإنكار لتدخل بمرحلة الكآبة والحزن وتحبس حالها بالبيت مع طفلها مابدها تشوف حدى أو حدى يشوف ابنها اكتآب فظيع .. انهيار كل شي بحياتها وهذا طبعا بأثر على حياتها الزوجية وعلى أطفالها اذا عندها أطفال آخرين مع الأسف كتير من الإحصائيات بتقول انه اغلب الأزواج يلي عندن طفل توحدي بينتهي بالطلاق لأنه المشاكل بتكتر وماعد في إحساس أمان بالبيت ومشاكل اقتصادية كونه العلاج مكلف جدا وخوف من المستقبل وعدم تقبل وجود طفل غير طبيعي بحياتهن 

 المرحلة الرابعة 

بتكون مرحلة لي بتقرر فيها الأم توقف على رجليها وتبلش العلاج مع طفلها هالمرحله طويلة وصعبة و نفسية الأم بتكون متضاربه بين شويه فرح وقت بقلولها ابنك عنده تحسن طفيف وحزن دائم وقت بتتذكر انه ابنها طفل مو متل باقي الاطفال ..

 بتتعرض الام كمان بهالمرحلة لضغوط نفسية كتيرة متل مثلا عدم فهم اطفالها الآخرين لوضع اخوهم او شعورهم بالغيره منه كونه هو كل اهتمامها .. 

وكمان كيف لازم تشرح للناس تصرفات ابنها الغريبة و أغلب الناس مع الأسف بتكون رده فعلهم مؤذية للأم وجارحة ..

 التعب كمان ما بكون نفسي بس .. وجسدي كمان ارهاق كونه طفل التوحدي عنده مشاكل بالنوم وغير ممكن القدرة على تهدئة الطفل في حاله هيجان بيطلب قوه جسدية هائلة. . 

وكمان مع الأسف بتصير حياتها الاجتماعية صفر و هذا مع الأسف غلط كونه جزء من علاج الطفل التوحدي لازم يختلط مع باقي أطفال جيله لكن نفسية الأم لي مابدها حدى يشوف تصرفات ابنها الغريبة و أسئلة الناس الحشرية كل هذا بيأدي انه تدخل الأم مع طفلها بعزلة اجتماعية. .

 الشغلات لي بتساعد الأم بحالتها النفسية 

 ايمانها القوي بالله تعالى انه حيشفيلها ابنها ... وإنه هاد قضاء وقدر ..

 زوج محب بيساعدها وبيحتويها وكل ما ضعفت بقويها

 الأهل طبعا دورهم كبير لازم يحملوا عنها كتف ويكونوا جزء من علاج طفلها 

 أصدقاء محبين يوفقوا معها ينصحوها يرفعولها معنوياتها 

 أيتها الأم طفلك يحتاجك أضعاف مايحتاجك لو كان طبيعياً

الطفل الطبيعي يستطيع أن يبحث عن تواصل عاطفي جديد وحقيقي من الأب أو المعلمة أو الأصدقاء أما الطفل المتوحد لن يجذبه لمحيطه إلا أنتِ وحبك ودفئك في تواصلك معه ليكون طبيعياً ولو بشكل جزئي 

 فعلاجه يبدأ منك وينتهي معك 

اللهم اشفي كل موجوع يارب العالمين ..

ولاء دركل