مـــذكـــرات عــــائلـــة ـ 4 ـ
بتصير مواقف مع ولادنا بيتصرفو فيها بشكل بيفاجئنا بطريقة تفكيرهم
بيسألونا أسئلة بتدل بوضوح على انهم أذكياء و عم يفكرو و يشغلو عقلهم
بس وين بيختفي هاد الذكاء عند الدراسة ؟؟!! مااا بعرف
بحس اني عم اشرح ألفية ابن مالك لطالب إيطالي
و بحس ابني عم يشوفني موظفة بنك عم تحكي من ورا بلور مسكر و نسيانة تفتح صوتها عالمايك
عيونو بتقلي انا مو هون.. عاودي الاتصال مرة أخرى و حاولي لاحقا
مشكلة قلة تركيز كرم تعبتني.. عم حاااول اضبط أعصابي و ما اتوتر.. بس لسه ما لقيت حل
..إلا ما تنحل.
بس المشكلة الجديدة هلأ عند غزل
صرلا فترة لااا مبالية بواجباتها و دروسها.. بيجيها طيف النوم من أول كتاب بفتحه
ماما حلي هاد التمرين..
" لا ما بعرف حلو.. هاد بدو شطارة و ذكاء و انا مو شاطرة و لا ذكية "
" لا ما بعرف حلو.. هاد بدو شطارة و ذكاء و انا مو شاطرة و لا ذكية "
تطلعت بعيونها كأن كان فيهم شي ما لاحظته من قبل.. كان صامت.. بس هالعبارة عملتلو صوت نادالي.. أفكار جديدة دخلت لراس غزل..
انها مو شاطرة.. و مو ذكية.. كيف؟ مين اللي قلك هالكلام ؟
" ماما انا جاوبت من يومين جواب غلط على سؤال بالعلوم ، وصارو رفقاتي يضحكو عليي ، رفيقتي علا بتجاوب على كل الأسئلة.. علا بتعرف كل شي.. علا بيحبوها كل المعلمات ... ماما أنا ما بحب الدراسة .. "
قدامي مشكلة جديدة... أزمة ثقة بالنفس
بدها حل.. حبيبتي غزل.. رح نحل الواجب هلأ و بكرا منحكي عن علا و منشوف شو المشكلة
رجع أيمن بعد ما وصل ماما للبيت.. الولاد نامو والجو مناسب للفضفضة
يلا خبرني.. شو اللي عكر مزاجك اليوم غير شقاوة كرم؟
مشاكل شغل.. تخيلي ريحان بدفع مقدم لشحنة أدوية للقلب بتوصلني بآخر صلاحيتها.. باقيلها أربع شهور و بتنتهي صلاحيتها..!! ما بعرف لو كان غلط من المعمل أو مقصود.. بس صاحب المعمل بيحاكيني كأنو مو ذنبهم!! و بيرفع صوتو عالتلفون كأنهم ما غلطو بشي !! و ما بده يرجع الفلوس.. اعتبرهم كلفة شحن!! و لا حتى بيعتذر.. انو عفوا حصل غلط و رح نبعت الشحنة المطلوبة.. انا لو انضبط عندي هيك دوا شو ممكن يصير.؟!! "
.. :\ الله يطول بالك
شفت حبيبي ؟ عرفت ليه طلبت تعتذر من كرم ؟ بدي ياه يتعلم انو الاعتذار صفة فضيلة.. لو صاحب المعمل تربى على هالشي ما كان تكبر عالاعتذار منك
..الاعتذار صفة احترام بتعلي مكانة الكبير قبل الصغير
تعال على غرفتهم شوفهم كيف نايمين
عطيهم بوسة على جبينهم ولو ما حسو
.." بابتسامة منو بيقلي..." اه منك يا ريحان ما بتفوتي و لا موقف..
شوية حنية أبوية مع شوي من براءة أطفال نايمين بيعملو توليفة ممتازة لنهاية اليوم
..هدوء بيبعد أي ضجيج..
..و راحة بتمسح التعب..
..يتبع ...
#للطفولةعنوان
#مذكرات_عائلة
#نورالأشقر