مذكرات عائلة ٢

مذكرات عائلة ٢


مشواري للسوق سريع..

ما رح اتأخر على ماما اللي منتظرتني مع حلا..

المهم اني جبت طيارة كرم أفندي :) ✈



و رجعت كملت نهاري اللي محليه وجودها

شو عنا عالغدا اليوم؟

صينية بطاطا بالبشاميل.. ورق عنب.. و سلطة خضرا

أنا و ماما بالمطبخ سوا؟ يعني قصص و حكي و بتونس بيك و انت معايا



و بعد العصر شو نتحلى؟ مممم كب كيك

غزل بتحب تساعدني فيه.. و انا بحب لمساتها..



دقت الساعة الثانية ظهرا ⌚

هلأ وقت الغدا.. استراحة أيمن و رجعة الولاد من المدرسة



أيمن... بحس أوقات انو في على عيونو مجهر غير مرئي :/

يعني مثلا...

أنا بشوف كرم عم يلعب بالمكعبات..



هو بيشوف كرم عم يلعب مع الجراثيم و الميكروبات :/

أنا بشوف الزينة على الكب كيك مجرد كريما و سكر ملون و أكلة لذيذة

هو بيشوفها جيوش جرارة زاحفة لتخريب الأسنان



حلوة رعاية الصحة و النظافة.. بس يمكن بحكم عملو.. أوقات بيبالغ شوي



دخل عالبيت اليوم مو رايق كتير.. أكيد صاير معو شي موقف

المهم.. أيمن حبيبي.. بليز.. لو سمحت .. ماما عنا.. ابتسم بعدين بفهم منك شو مدايقك.. اتفقنا؟ اتفقنا :)



طبعا غزل و كرم.. من المدرسة لأحضان التيتة بسررررعة عطوها البوسات و الضحكات و عطتهم الضمات و الحكيات العسل و مو أغلى من الولد إلا ولد الولد



تغدينا.. و تسلينا.. و صارت وقت الحلى يا حلا..

ماما و أيمن بالصالون سمعانة حكيهم مع صوت التلفزيون..

و غزل عم تزين معي الكب كيك.. و دااااائما بتفاجئني بلمسة مختلفة.. ناعمة بتطمني انو هالبنت طالعة لأمها



شوي و ماما بتندهلي... " يا ريحان.. كرم عندك؟ مو طالع صوتو.. يا كرم.. يا كرم.. جبلي كاسة مي يا تيتة"..

ــ لا كرم مو عندي..

كرم ... كرم... كرم!!!!!

وين كرم!!



بسمع صوته من غرفتو.. " ماااامااا أنا هووون "

بدخل لغرفته ما بشوف شي...!! رفعت راسي لفوق..

و إذذذ بلاقيه فوق الخزانة متل الجندي المتربص عالثغر

وقع قلبي من منظره



بصرخ عليه لك كييييف طلعت لهووون يا ماما .. ما خفت توقع و تئذي حالك لا سمح الله...!!

بيكمل أيمن.. و بيقول بصوت عاالي.. ظهر الخزانة كلو غبار يا بابا هلأ بتستنشقهم مع الهوا و بتمرض!!

( يعني ما اختلفنا.. بس انو خطر الوقعة من فوق خزانة واصلة للسقف بيخوف أكتر مو ؟ )


الله يهديك يا تيتة على هالشقاوة



كرم بيقلي.. " ماما تعالي شوفي ألعابي من هون شكلهم حلو ...

شوفي سياراتي كيف طالعين صغااار

شوفي دبدوبي الكبير.. شكله مضحك طالع صغير

ماما أنا بدي صير طيار و شوف الدنيا و الناس صغار متل بيت الألعاب..



يا ماما انشالله بتصير أحسن طيار.. بس هلأ تعال لتحت قبل ما يطير الكب كيك و يروح عليك

و لااااا تعيدها مرة تانية..



الحمد لله انو كانت التجربة من فوق الخزانة..

الحمد لله ما خطرلو يجرب يطير من الشباك



خيال الأطفال شو واسع.. اديه لازم نقرب منهم لندخل لعالم تفكيرهم و نشوف الصور اللي عم يرسموها بخيالهم..

عالم عفوي... بريء... و خطير أحيانا..

بابه كبير و مقفول... و مفتاح هالباب... انا نكون نحنا وياهم

" أصدقاء "



يتبع...


نور الأشقر