مذكرات عائلة

مذكرات عائلة 

صباحي اليوم حلو.. 

الدنيا ربيع.. السما مغيمة شوي.. غيم خفيف.. 

نسمة هوا رقيقة عم تحرك عروق الريحان و الياسمين 

صوت فيروز من راديو المطبخ ملون الجو.. و بعدك على بااالي.. يا قمر الحلوين.. 

ريحة القهوة.. مممم شو حلوة.. مو حلو الصباح بلاها

و أحلى شي بهالصباح انو ماما عندي اليوم ☺☺.. تاج راسي الله يخليكي النا.. 

أنا وياها عالبلكون و قاسيون طالل من بعيد .. 

سقت الزريعة بإيدها الحنونة و أنا عم شوف عيونها اللي عم تبرق تحت النظارة على خدودها الموردة..

" - ماما تنزلي معي اليوم عالسوق؟ بدي جبلو لعبة طيارة لكرم

- كرومتي حبيب التيتة يسلملي .. هالجيل ما بيشبع من الألعاب.. 

اييه سقاالله زمان لما كنا نروح لبيت ستك و تعطينا حبات فاصوليا يابسة.. نلعب فيهم ساعات.. و نركض حوالي البحرة و نرش بعضنا بالمي..

قالت و هية عم تضحك : 

و خالك جميل ياخد ريشة حمامة واقعة بأرض الديار و يغافل ستك و هي عم تلف اليبرق.. 

ينزل تحت الطاولة عالساكت و يدغدغلها رجلها يخليها تضحك من قلبها .. 

و نضحك نحنا معها طول النهار ☺.. "

بس أيامنا اختلفت يا ماما ☺.. 

عطيني بحرة و بيت متل بيت ستي.. 

الولاد عم يشوفو ألعاب أشكال ألوان.. لا بد يشتهو.. 

انا وعدتو فيها من فترة لما ياخد علامات منيحة.. و لازم وفّي بوعدي

بقيت ماما مع حلا و بعدها بطريقي للسوق.. صرت فكّر بكلامها عن ذكرياتها.. و فكر بحالنا.. شو رح نحكي لولادنا.. و ولادنا شو رح يحكو لولادهم؟ ؟

يمكن معك حق يا ماما .. البساطة بتحلي كل شي

و رسم البسمة ما بيكلف كتير :)

يتبع .......

نور الأشقر