مذكرات عائلة 6

 مذكرات عائلة  6 

خلصت الغدا..  

و أيمن دخل ياخد غفوة صغيرة.. 

بهالوقت شغلت كرم بالألوان و حلا بالألعاب..  و تعالي يا غزل بدي ورجيكي فيديو لمقلب كتييير مضحك

اي..  مضحك لا بد الحوار يكون بجلسة مريحة.. 

غزولتي..  حابة أنا و انتي نحكي لبعضنا أسرار..  و كون أنا رفيقتك و انتي رفيقتي..  ما بدي خبر كرم و لا بابا..  حديث بين ماما و غزل و بسس.. 

بدي تحكيلي عن مدرستك..  عن رفقاتك..  مين رفقاتك المفضلين و مين اللي مو كتير بتحبيهم..  في منهم مزعجات؟  بتحبي المدرسة؟  او لا بتحسيها بس واجبات و شغل و ملل؟ 

بتقلي..  " ماما طبعا الدراسة ملل  و كل الولاد بيفرحو بالعطلة أو لما المعلمة بتغيب.. بس رفقاتي...   مممممم" 

شو؟  احكيلي عنهم.. 

" عنا شلة من أربع بنات. كلما جاوبت جواب غلط بيستهزؤوا و بيضحكو عليي..  لما المعلمة رشحتني للمسابقة..  صار يتغامزو و يقولو ما رح تقدري تفوزي على مية بنت شاطرات ترشحو من كل مدارس المدينة .. :( 

و المسابقة صعبة و انا ما بدي شارك..  بخاف اخسر و يضحكو عليي أكتر

لحتى اربح لازم ادرس كتير كتير و اقرأ صفحات إضافية..  شي متعب و ممل..  انا بحب العطلة الصيفية..  منلعب فيها مع رفقاتنا اللي ما بيزعلونا  و لا بيقولولنا انتو فاشلين "

ممممم رح احكيلك حكاية كتيير صغيرة..  عن تاجرين جيران بمحلاتهم

التاجر سمير..  و التاجر أمير

كان سمير تاجر نشيط..  بيفتح محله بكير و بيبدأ يستقبل الناس بوجه مبتسم.. ☺  محله دائما مرتب و نظيف و جذاب..  و دائما عندو أفكار و طرق مختلفة بعرض بضاعته.. و كان عنده سلة صغيرة فيها سكاكر بيضيف منها زواره الأطفال..  كانو الناس يحبو يشترو من محله دائما.. محله دائما في ناس عم تشتري و هو يصير دائما مشغول..  لدرجة انو ممكن ينسى يتغدا من كتر الشغل و الزحمة..  بس بنفس الوقت كان سعيييد كتير ☺ لأن كان عم يجمع فلوس كتير و محله ينجح أكتر و أكتر

أما جاره أمير كان يفتح محله متأخر.. يوصل للشغل كسول..  كان موفر بالمحل مكان خاص الو..  مكان هادئ.. فيه تلفزيون و كنبة كبيرة و براد صغير فيه حلويات و عصير كتير 

و مو مهتم بالناس اللي بتزور محله و لا بيحب يبتسم الهم 

لهيك ما كانو يحبو يشترو من عنده..  و هو يكون معصب دائما لانو ما عم يجمع فلوس كتير متل جاره سمير... 

هاد بيعني انو أحيانا الراحة بتتخبا جوا التعب.. 

ممكن الدراسة تتعبنا شوي و تخلينا نصحى بكير و تحرمنا من وقت أكتر على التلفزيون..  لكن تخيلي لو ما في دراسة!! يعني صرنا كائنات عم تاكل و تنام فقط..  ما بتقدري تقرأي كتاب..  ما في تطور ما في اختراعات مفيدة.. الحياة رح تصير بشعة كتير  

 

أما استهزاء رفقاتك.. لازم يزعلهم الهم..  عم يكتب بصحيفتهم سيئات.. و انتي تاخدي من حسناتهم

ممممم..  عطيني لعبة الميكي ماوس..  بتعرفي انو صاحب فكرة ميكي شخص اسمو " والت ديزني"  كان يحب يكتب قصص و يرسم شخصيات كرتونية.. لكن بالبداية واجه صعوبات و مدراؤه بالشغل فصلوه و قالو عنو فاشل..!! لكن هو ما استسلم..  و توصل بمساعدة صديقه لرسم شخصيات ديزني اللي بيحبوها الأطفال لليوم 

دااااائما دااااائما بطريقنا للنجاح..  رح يقطع علينا هالطريق ناس بيوصفونا بالفشل و بيستهزؤوا بموهبتنا و قدرتنا.. 

الشاطر هو اللي بيرفض يسمعهم و بيرد عليهم بنجاحه 

أما المسابقة ممم فأنا ما بيهمني تفوزي فيها.. 

فتحت عيونها و اندهشت و قالتلي " كييييف!!! "  

اي انا بدي اطلب منك انك بس تحاولي بكل وسعك.. انك تجاوبي عالأسئلة صح و تشاركي و تعملي تجربة مفيدة..  طبعا بتمنى تربحي..  بس لو ما ربحتي ما رح ازعل..  

 " ماما عن جد ما رح تزعلي"  

لا ما رح ازعل..  الحياة تجارب..  مرة مننجح و مرة لأ.. الخسارة هي بس للي قرر يستسلم و ما يعمل أي تجربة 

غزل..  الله خلقنا هيك..  الأخطاء هي شي من طبيعتنا..  ما في و لا إنسان ناجح دائما و بكل شي..  في فقط تجارب بتنجح أو لأ

و نحنا ضعاف..  منحتاج دائما لعون و توفيق من رب العالمين.. 

يعني هلأ كل المطلوب..  تهملي كلام رفقاتك لانو ماما بتشوفك ناجحة...  و تدرسي على قد ما بتقدري.. 

و تدعي الله من قلبك و انتي متأكدة انو عم يسمعك و رح يعينك

لأي موقف صعب..   قولي " استعنت بالله "  قوليها و حسي بمعناها

يا رب استعنت فيك.. 

 بتوكل عليك.. و بوثق برحمتك.. 

رح ودع غزل على مدرستها صباح اليوم التالي..  و عيد عليها هالكلمات.. 

غزل..  تطلعي بعيوني.. 

يا رب..  استعنت فيك..

  بتوكل عليك.. 

 و بوثق برحمتك.. 

نور الأشقر