مذكرات عائلة 7

مذكرات عائلة 7  

" و ابتغِ فيما آتاك الله الدار الآخرة  ،  و لا تنسَ نصيبك من الدنيا ، و أحسن كما أحسن اللهُ إليك ،  و لا تبغِ الفساد في الأرض  ،  إن الله لا يحب المفسدين  "

صدق الله العظيم .. 

سمعت هالآية اليوم الصبح من قناة القرآن الكريم..  رغم اني ما كنت مركزة و عم اشتغل بالبيت و لحّق وجبة الغسيل قبل ما تنقطع المي..  

بس وقعت على مسمعي كأني بسمعها لأول مرة !! 

أديه نحنا منقصد من أعمالنا رضا الله ؟..  

و لما نتعامل مع ولادنا منستشعر هالمعنى ؟  عم نربيهم ليكونو صالحين يحققوا مراد الله من خلق البشرية ؟  القوانين الأوامر اللي عم نفرضها عم تكون لهالغرض؟  و لا بس لمجرد فرض الطاعة لأنو نحنا آباء و أمهات لازم نكون مطاعين.. 

لأي درجة..  نحنا متوازنين؟  محسنين و مخلصين ؟ 

يا الله اديه ناقصنا عمل و جهد و صبر !! 

حسيت إني مقصرة..  الأمومة أصعب من خيالنا لما كنا صغار

فكرناها مجرد العناية باللعبة البيبي تبعنا.  نحممها..  نطعميها.. نغنيلها لحتى تنام.. و نلبس لبس الأمهات..  و نستعير من ماما شوزها بالكعب العالي 

بعترف بتقصيري معهم.. لهلأ ببعض الأحيان  عم بفقد صبري و علّي صوتي.. مقصرة معهم بالأنشطة المنزلية اللي بتخليهم يلعبو و يتعلمو و بتقربني منهم أكتر..

أوقات بطبق شغلات حلوة تعلمتها من النت و أوقات أكتر بنساها.. 

عم حس انو الأربع و عشرين ساعة ما عم يكفوني  

بس برجع بقول انو المشكلة مو بالوقت..  بل بإدارته.. 

نهار كل الناس..  ناجحين أو كسولين أو مقصرين هو أربع و عشرين ساعة..  و انا لاااا زال عندي مشكلة بإدارة وقتي

سبحان الله..  الإنسان بيضل ضعيف.. لكن ما لو غير انو يستمر بالمحاولة..

بما اني اليوم فايقة بكير بهمة و نشاط.. وهالآية اللي سمعتها الصبح أثرت فيي و أنعشتني..  عم فكر بشي نشاط أو لعبة لكرم.. شو نعمل؟  

ممممم..  فكرة باركنغ السيارات سهلة و حلوة و عجبتني.. بلكي بيصرف نظر عن الطيران شوي   ناقصني بس شوية ألوان مائية.. 

نزلت مع حلا القطة للسوق القريب..  و عالمدخل شفت عيلة جديدة رح يسكنو بعمارتنا.. و عم ينقلو غراضهم.. 

ما شاء الله..  مفروشات فاخرة..   واضح انهم ميسورين مادياً..  الله يتم عليهم..  يا ترى من بيت مين..  و كم ولد عندهم.. ؟ 

انشالله يكونو طيبين..  الجار الصالح نعمة كبيرة 

طبخة اليوم محاااشي..  و الحلو مهلبية.. لازمني دعم معنوي لحس اني أم مثالية..  يعني وجبة اليوم عز الطلب!! 

و متشوقة لترجع غزل من المدرسة لاسمع منها كيف شعورها اليوم بعد جلسة مبارح.. 

متشوقة.. ليرجع كرم و نعمل نشاط الباركنغ سوا.. 

متشوقة ليرجع أيمن و احكيلو عن الرواية اللي عم اقرأها.. 

نهاري اليوم طاقة و همة و حيوية.. 

عن جد صدق رسول الله..  " بورك لأمتي في بكورها " 

يا رب تساعدني لحتى تصير عاادة و طبع..  

محتاجين عونك يا رب بكل لحظاتنا... 

نور الأشقر