مذكرات عائلة 9

 . مذكرات عائلة  9. 

كرتونة مستعملة ..  ألوان مائية... ورق ملون..  قلم تخطيط 

و كم سيارة من سيارات كرم... كانو مكونات لوقت ممتع كتير قضياه سوا بصنع الباركنغ.. 

. " ماما هاد الكرسي الصغير اللعبة هو موقف لانتظار التاكسي..  

ـ اي ماما فكرة حلوة.. 

ـ ماما كمان بدي حط شجرة حرام ينتظرو تحت الشمس .. 

ـ برافو ماما..  فكرة ذكية و حلوة " 

أثناء اللعب و الدردشة مع أطفالنا منتعرف على عقولهم عن قرب..  مرات بيفاجؤونا و مرات بيفرحونا بطريقة تفكيرهم

كتير بتقرب المسافة بيننا وبينهم..  من عدا انها بتنقش ببالهم ذكريات ما بينسوها لحتى يصيرو كبار و يحكوها لولادهم

كيف المدرسة اليوم يا غزل..؟ 

ـ ماشي الحال ماما 

ماشي الحال شوي و لا كتيير؟  

ـ ماما انا فهمت كلامك بس مو كتير مبسوطة  .. و لسه رفقاتي عم يعملو تصرفات مو منيحة..  بعرف انو الدراسة مهمة بس مملة مملللة مملللللللللة..  

 

تعالي غزل تعالي

بدي ورجيك صور لأطفال عايشين ببلاد بعيدة و فقيرة 

ما عندهم متلنا سيارات كتير و اوتوكارات و لا باصات كبيرة

لهلأ بيستعملو عربات خشبية و بعض الأماكن عندهم ما فيكي توصليلها الا بجسر معلق من حبال و خشب

تعالي شوفي كيف الأطفال عندهم بيقطعو مسافات صعبة بس كرمال يتعلمو.. ليه؟  لانهم بيعرفو انو العلم بيستحق كل التعب اللي بيواجهنا بطريقنا الو .  

بتعرفي غزول..  كل معلومة منحصل عليها بتشبه الليرة الذهبية..  في ناس متعلمين و مثقفين..  الحديث معهم بيشبه الدخول لبيت كبيير حلو و مزخرف و ممتع و فيه كتير أدوات بتساعد الإنسان وبتفيده..  بتلاقيهم أغنياء بالعلم و حديثهم ما بينمل

ممكن أحياناً تفتحي كتاب التاريخ و تقولي انا شو بدي بقصص الناس اللي ماتو ؟  شو دخلني بقائد هالمعركة و قصة حياته ؟  ليه بيعلمونا تاريخ منطقة و طريقة حياة سكانها 

بس انت بدون ما تحسي رح تستفيدي من تجاربهم و تتعلمي من أخطاءهم..  تاخدي خبرة عمرهم ملخصة بكم سطر..  لا تندمي على أي شي قرأتيه أو تعلمتيه أبدا

بالآخر كللو ليرات ذهبية ثمينة بتزيد عقلك غنى.. 

هلأ قبل النوم..  رح نحكي قصة العصافير الثلاثة اللي كانو يتساعدو مع بعض و يتعبو و يبحثو عن حبات الأكل.. 

لحتى وجدوا غابة فيها شجرات كتاار و مليانة من كل أنواع الثمار اللذيذة..  

كرم بنص القصة بيتحمس..  و بيقاطعني " ماما..  ماما..  أرجوووكي جيبولنا عصافير الي و لغزل و لحلا.. " 

طيب رح نسأل بابا..  شو رأيك يا بابا ؟ 

تغيرت ملامح أيمن كأنو شاف كتيبة فيروسات  يا بابا العصافير ممكن تسببلكم تحسس و من عدا انها بتوسخ مكانها كتير ببقايا أكلها  ووووو..

  قاطعه كرم بعيون الرجاء البريئة و ضم ايديه لبعض و شبكهم و قله أرجوك بابا أرجوك  

منخليهم بالبلكون و بيبقى البيت نظيف و انا رح طعميهم و شربهم مي..  خليهم يصيرو أصدقاءنا أرجوووك 

ابتسم أيمن ابتسامة اللي ما لو حيلة قدام هالعيون البريئة 

و قلو حاااضر كرم أفندي و أحلى ثلاث عصافير صغار لأحلى ثلاث عصافير كبار 

صارو ينطو من الفرحة  و شكلها النومة كمان نطت لبعيد 

تأخرنا على موعد النوم و صار لازم اعزف موسيقا هادية ليرجع النعس لعيونهم.. 

بس الحلو.. انهم نامو كتييير فرحانين 

يُتبع

نور الأشقر