مذكرات عائلة 10

  مذكرات عائلة 10 

قهوة الصبح اليوم بطعم الذكريات ..  مع رفيقتي القديمة و جارتي الجديدة سلمى .. 

سلمى من زمان كانت فراشة المدرسة..  شخصية مرحة كتير و صاحبة نكتة 

مبدعة بتقليد الشخصيات و الأصوات..  

المقالب..  الضحك..  الفرح..  المرح هو جوها و عالمها

بس كانت تكره شي اسمو امتحانات و دراسة و كتب و ورق 

بتعتبر وجودها بالمدرسة شر لا بد منه..  مو مصبرها عليه غير شلة هالرفقات المميزة.. 

للأسف غادرتنا بكير و تزوجت بأول الصف العاشر..  سافرت..  غابت و غابت معها أخبارها..  و اليوم أنا سعيدة بهالصدفة الرائعة اللي رجعت جمعتنا 

استقبلتها بحرارة و شوق بعد غياب طويل.. 

كان معها صبية صغيرة متل الوردة أول ما تفتّح.. 

لك يا هلا بسلمى.. نورتي و اشتقناااالك مين هالأمورة الحلوة؟ 

" هي بنتي روان..  بالصف التاسع هلأ..  شايفة هالسنين كيف بتمر  "

"  ما شاء الله ما شاء الله ..  مبينين اخوات الله يحرسكم  "

هاتي احكيلي كيف مضيتي هالسنين و كيفك مع الأمومة  ☺ 

و بعد كلمة " احكيلي  " مضينا ساعتين و نص حكي عن الماضي و ذكرياتنا و كيف كبرنا و كبرت مسؤوليتنا.. 

مر الوقت و سرقنا و لسه ما خلصنا..  شافت الساعة بإيدها و صار وقت ترجع للبيت..  لكن طلبت مني طلب( بحكم اني خريجة أدب عربي )  اني أعطي بنتها دروس خصوصية لتقوى بهالمادة المهمة.. 

و طبعا هاد من دواعي سروري  

تودعنا و استقبلت الولاد.. دخلت للمطبخ لتحضير الغدا.. الحمد لله عندي طبخة من مبارح للتسخين.. 

حلا عم تشدني من تيابي للاعبها بالمكعبات و أنا عم صبّرها لحتى اخلص شغل

غزل و كرم عم يتفرجو عالتلفزيون لبين ما اخلص.. صوته و صوتهم مسموع لعندي عالمطبخ 

معروض برنامج عم يحكي عن حياة فنانة مشهورة  و مشاهد منه مصورة من داخل بيتها الفخم و  اللي فيه مرافق كتير و مسبح كبير و صالة سينما و ألعاب.. 

كرم مندهش و عم يقول لغزل : " واااااو ما شاء الله شو بيتهم حلووو و كبييير " 

غزل بتقلو :  " اي بس هاد البيت بيتمتعو فيه بالدنيا بس..  و بالآخرة بيروحو عالنار لأنهم مو مسلمين متلنا !! " 

دقت أجراس الإنذار براسي..  تركت الشغل و رحت لعندهم

غزل..  غزل...  غزل.. ماما  ليه عم تقولي هيك ؟! 

هاد الكلام ما بيصير نقوله أبدا...  الله وحده بس اللي بيعرف مين بيدخل الجنة و مين لأ..  نحنا ما بيصير أبدا أبدا نحكم على شخص انو مؤمن و بيروح للجنة أو لأ.. 

و  ياما ناس كانت تصرفاتهم سيئة بحياتهم.. لكن بعدين تابو و صارو مؤمنين بيعملو الخير.. 

و ناس تانية يا ماما كانو مؤمنين و بعدها فجأة صارو يعملو تصرفات سيئة كتير.. 

فنحنا ماااا دخلنا أبدااا.. حتى من جواتنا لما نحدّث نفسنا  مو لازم نحتقر حدا و نعتبره سيء أو نظن انو نحنا أحسن منه.. 

كل البشر مخلوقات الله...  منحبهم لكن ما منحب تصرفاتهم السيئة..  ممكن ننصحهم لكن ما منوصفهم بصفات سيئة..  هنن أحرار بحياتهم طالما ما عم يؤذونا بشي..  الله وحده بيحاسبهم و بيعرف شو في بقلوبهم

هاد الكلام ما تقوليه مرة تانية.. اتفقنا حبيبتي ؟ 

اتفقنا ماما  

نور الأشقر