مذكرات عائلة 16

 مذكرات عائلة . 16 . 

قلبي مو متطمن

صحيح أيمن نبه الولاد ما يحكو شو شافو

و لا يرددو شي من اللي سمعوه بالمظاهرات.. بس لازم ابقى عم ذكرهم دائما.. 

كرم زعل مني لاني ما عم خليه يرافق أبوه للمسجد يوم الجمعة..  و أيمن بيقلي لا تخافي.. عيني عليه و معي كل الوقت.. 

عموما هلأ لازم نركز عالدراسة أكتر

صرنا بآخر السنة و مو باقي للامتحانات وقت طويل

تساهلت مع الولاد بالفترة الماضية بدراستهم بس هلأ بدنا نركز أكتر.. 

غزل الله يرضى عليها بكلمتين تذكير و بشوية رفع همة بتشد على دروسها.. 

بس كرم.. ااه من دراسته ..  أكتر من ربع ساعة لا يمكن يبقى قاعد معي عالطاولة.. 

بيركز على كل شي بالغرفة من عدا دروسه.. 

ماما حلا عم تبكي

ماما عطشان 

ماما جوعان

ماما ممكن روح عالحمام؟ 

ماما جبلك مي؟ 

بابا بدو قلم 

ماما عم يندق الباب

مااا بيخلي حجة ليبعد عن كتبه متل المغناطيس المتنافر 

لفترة جربت فكرة لعبة السيارة أثناء الدراسة 

فكرة بسيطة.. 

ورق أشغال ملون 3 ألوان بيكفي.. 

منقص هيكل السيارة و منفتح الكتب 

و كلما خلصنا واجب مادة من المواد رح نركب للسيارة جزء 

شباكين و دولابين لحتى تجهز الواجبات و تجهز السيارة و تقدر تمشي.. 

و لما تجهز بكتب عليها عبارة تشجيع و منعلقها بدبوس بغرفتو أو عالبراد

و مع كل عشر سيارات رح ياخد لعبة صغيرة عبارة عن شو؟ 

سيارة.؟ 

لأ...  طيارة.. 

 لانو هو بيعشق الطيران و الطيارات  

و أحيانا منمرق كم سيارة صغيرة..  حسب مزاج الأفندي.. 

بقيت هالطريقة ناجحة لفترة منيحة 

بس هلأ رجع يخلص صبره  :/

لهيك صرت اعمل فواصل بكتابة الواجبات

طبعاً أحسن الي انو نقعد و نخلصهم ورا بعض

بس سبحان الله البنات بالهم أطول على دراستهم من الصبيان بشكل عام 

لهيك صرنا نعمل واجب الرياضيات مثلا و يروح بعده ربع ساعة يلعب لعبة 

و يرجع يكمل واجب العلوم و هكذا.. 

طيب ليه عم تسايريه كل هالقد؟ 

لازم يفهم انو دراسته واجب ضروري.. 

اي لازم..  بس إدراك الطفل صعب يقدّر أهمية الأمور..  بيروح للشي اللي بيسليه دائما.. ما بيهمه لو كان مفيد أو لا

لهيك لازم حط الدروس بقالب مسلي.. 

لو عملنا الدروس تحت عصا التهديد و شد الشعر.. 

رح يكره الكتب و المدرسة كل عمره.. 

متل ما كرهها كتاااااااار من أبناء جيلنا.. 

و أنا بدي ولادي يحبو العلم من حالهم..  بدون ما بلعهم ياه غصب متل ملعقة الدوا.. مرة بس لازم يشربوها لأنها مفيدة ... 

خلص النهار و خلصت طاقتي معو 

بس تلفون صغير مع حدا منحبه بيرجع بيشحننا شوي.. ☺ 

اتصال من اختي الظريفة اجا بوقتو.. 

" كيييفك يا ريحاان..  "

ألف الحمد لله و كريتلها مشاغبات الولاد تبع اليوم و نقيت لشبعت.. و بعدها... سكتت.. 

اختي متزوجة من خمس سنين بس لسه الله ما رزقها بولد.. 

قالتلي الله يحميهم و يدوقني هالغلبة و المشاغبة.. 

دمعت عيني و قلتلها آمين يا روح قلبي.. الله لا يحرمك و لا يحرمنا من فرحتنا بحملك" 

حطيت راسي عالمخدة و فكرت اديه نحنا مننق و منشتكي من شغلات.. غيرنا بيعتبرها حلم حياته.. 

الله يرضينا و يرزقنا شكر نعمه و حسن رعايتها

و لا يخليهم بخاطر حدا.. 

يتبع.. 

نور الأشقر