مذكرات عائلة ١٧

شوب شوب شوووب

هربان من عز الصيف هاليوم 

و فوقها قطع كهربا كمان مشان تكمل 

صرلها اكتر من تسع ساعات مقطوعة

غرفة الجلوس صارت متل الساونا من كتر الحر

الولاد عم ينقو و مالهم خلق يلعبو بشي و لا انا عندي همة سليهم 

و اليوم عندي درس خصوصي لبنت جارتي كمان 

بس لازم نعمل شوية جو منعش لنطلع من هالكسل

دخلنا عالحمام و عبينا البانيو مي و حطينا فيه الألعاب اللي بتطوف على سطح المي و مضينا فيه أكتر ساعة رشرشة و انتعاش 

خلصنا لعب و لسه ما في كهربا 

شو نلعب كمان؟ 

جبت مدة للأرض أو شرشف قديم

و بخاخات ماء و تمددنا انا و الولاد عالأرض و قلتلهم تعالو نتخيل انا موجوين بمكان حلو فيه شجر و نافورة 

و النافورة مليانة مي و نحنا متمددين جنبها و رذاذ ماءها عم يرطب وجوهنا

رح نرفع ايدينا و نبخ المي باتجاه السقف و ينزل الرذاذ على وجوهنا ببطئ و لطافة و ينعشنا و يخفف الحر

بدينا فرفشة و انتعاش بهاللعبة البسيطة

و حلا صارت تنعشنا أكتر بصوت ضحكتها كلما دغدغها رذاذ المي و لامس وجهها الصغير.. 

تحبس نفسها و تاخد شهيق و تضضضحك كأنها عم تغطس بمسبح و هنن كلهم نقطتين مي

اندق الباب و اجت روان لوقت الدرس و شافتنا فرحانين بهالنافورة الخيالية كأنها نافورة دبي 

قالتلي ممكن ألعب معكم شوي؟ ☺☺

طيب خمس دقايق بس لحتى ما نتأخر عن درسنا

هالمراهقة الصبية عم تلعب مع الصغار كأنها بعمرهم 

و عن جد المرح ما بيعرف عمر

بلمسة كتير صغيرة منعمل فرح كبير 

مضت بعدها كم دقيقة و اجتتتتت الكهرباااا

طبعاً نحنا الشعب المميز اللي بيرقص و بيفرح كلما اجت الكهربا..  رقص و فرح كترفيه يومي 

راجعنا درسين قواعد و شوية تمارين إعراب و شرح قصيدة و مفرداتها.. 

هالمرة أكتر مرة حسيت فيها روان مرتاحة بالدرس و كأنا فعلا وحدة من العيلة.. 

تفاعلت معي منيح و صارت تجاوب بسرعة..  و الإعراب عندها متحسن كتير 

فرحت بحالها و اندمجت و صارت " من باب الفكاهة"  تعرب أي شي عم احكيه.. 

فجأة سمعنا عن جديد صوت هتافات قريب من حارتنا 

و المنظومة سمعت الكلام و بلشت تعرب 

قلتلها لا يا حبيبتي إلا هدول..  

ما فيكي تحكي فيهم لا عن الجار و لا المجرور و لا الفاعل و لا الضمير المستتر

وراهم قصة كبيرة ممنوعة من الإعراب :/ و ما بتوصفها القصايد 

نور الاشقر