المعكروووونة
يا عشق الولاد لهالأكلة.. لو بطبخها كل يوم ما عندهم مانع :/
و باقي الخضار المظلومة يا حرام لازم تدخل لوجبتهم تحت رعاية جناب المعكرونة لحتى تصير طيبة و مقبولة :/
كتير أكلات لازم نخدع ولادنا بطريقة تقديمها بوجبتهم لحتى ياكلوها..
المووز حتى لو مكيجته ما بياكلوه لحاله :/
لازم يتخبى بقلب الكوكتيل او يتغطى بشوكولا مذوبة
و الخضار لازم تتخبى بين المعكرونة لتمرق بوجبتهم بسلام
لازم دائما جرب طرق جديدة لحاول خليهم يستفيدو من الأطعمة..
يعني غدانا اليوم معكرونة مع الخضار و البشاميل
بداية أسبوع جديد
و اليوم أول يوم بداية دروس خصوصية لروان بنت جارتي سلمى ، خلصت الغدا و تدريس الولاد و جهزت المكان و استقبلتها عالموعد..
كانت خجولة شوي و ملبكة..
بديت بالتمهيد لأول درس.. و شرح أول قاعدة
ما عم تطلع منها أي ردة فعل.. عم تستوعب أو لأ.. ملت أو لأ..
سألتها.. واضحة الفكرة ؟
قالتلي اي..
طلبت منها تعيدها باختصار.. سكتت و ما جاوبتني..
سكرت الكتب.. و قلتها شو رأيك هالمرة ما ندرس شي
نتعرف على بعض أكتر.. لحتى تحسي انك مرتاحة..
احكيلي.. بتحبي العربي أو لا؟ .. شو المواد اللي بتحبيها..؟
شو ألوانك المفضلة..؟ و أكلاتك المفضلة.. ألحانك المفضلة.. هواياتك..؟ و شو الأماكن اللي بتحبي تزوريها..؟
عم تجاوب و تبتسم و تبدا تحسني اني مو شخص غريب..
مر شي نص ساعة و هي عم تحكيلي عن أشياءها المفضلة و أحلامها و هواياتها و رفقاتها..
بعدين قالتلي..
" خالة.. أنا من زمان ما حدا سألني شو بحب و شو أشيائي المفضلة "
قلتلها " معقوول.؟ بس ماما أكيد بتعرفهم.. انتي بنوتتها الحلوة اللي بتحبها كتير "
قالت " ماما بتحبني بس ما بتحكي معي كتير
بتسألني عن مدرستي أكتر شي.. عن الدروس و المعلمات و الواجبات و رفقاتي..
أنا بحب الرسم.. بس ماما بدها اتعلم منيح لحتى صير دكتورة
دروس العربي مهمة لان علامتها أساسية مو لانها مادة مهمة
أهم شي اني جيب علامات تامة و كون متفوقة
مع انها لما كانت قدي ما كانت شاطرة كتير :/ "
قلتلها حبيبتي لانو ماما بتحبك ما بدها تكرري غلطتها.. بتتمنى تشوفك أنجح و أشطر البنات
أوقات منسكت لوقت طوييل و بدنا أي حدنا يطلب منا نحكي لحتى نكسر الباب المسكر على حالنا و نطالع كل الحكي ..
يمكن المراهق بحاجة لهالحوار أكتر من غيره..
عم يكوّن نظرته للحياة بعين الشخص اللي عم يكبر و يستكشف و بعين الطفل البريء..
نظرة لسه ما توازنت.. لا هو طفل و لا هو بالغ..
تكوين الصداقة معه شي كتير ضروري الو و لأهله..
المزارع بيزرع نبتة.. بيداريها و بيسقيها و بيصبر عليها لتبدا تنمو و تزهر و بينتظر يشوف نتيجة زراعته
و نحنا منزرع بأطفالنا القيم و منبدا نطلب نشوف زرعنا فيهم عم يكبر..
منطلب منهم عمل أكتر و تفوق و منحاسبهم على أدق الأخطاء و منمنعهم من أي شي بيخوفنا عليهم
بدنا نشوف فيهم الثمار اللي ما أزهرت فينا.. و مننسى انو هي حياتهم اللي رح يمرو فيها متلنا بكتير تجارب.. تصنعهم و تعلمهم و تصقلهم
بيكبرو قدام عيوننا متل نبتة طرية.. من خوفنا عليهم ممكن نحجب عنهم الشمس و الهوا اللي بيكونو بأمس الحاجة الها
لسه بدهم وقت و سقاية و اهتمام و مداراة ليصيرو شجرة ثابتة ما بتكسرها الريح..
شجرة مزهرة تطرح ثمار حاملة نفس البذور الطيبة.. لحتى تزرعها بنفس الأرض..
و يستمر عطاءها.. جيل بعد جيل..
يتبع...
نور الأشقر
