من حوالي سنة انعزمت على حفلة لعيد ميلاد بنت صديقتي.. ما كانت حفلة تقليدية و ما كانت بس بسبب ذكرى ميلادها.. كانت مرتبطة برقم السبع سنوات تحديدا..
يعني هلأ هالبنوتة الحلوة بمناسبة إكمالها للسبع سنوات رح تبدا تتدرب على أداء الصلاة و تجرب تصوم نص نهار رمضان
انجمعو هالأطفال الحلوين لابسين ألوان الفرح
و صديقتي عملتلهم فقرة مسلية بتحكيلهم عن الصلاة و فيها أسئلة و أجوبة و هدايا رمزية صغيرة فرحو فيها الأطفال كتير
و قالت لكل الأطفال انو بنتها هلأ كملت السبع سنين و رح تتدرب على أداء الصلاة.. يعني حسستهم انها دخلت لمرحلة حلوة و مهمة و بتستحق هالاحتفال..
بقيت الفكرة ببالي.. و هلأ باقي أسبوعين تقريبا و كرم بيكمل السبع سنين..
عم حرك الطبخة و حرك أفكاري.. مين اعزم.. شو الأكلات اللي اعملها.. شو الزينة اللي اختارها و شو الهدايا..
كعادتنا نحنا الأمهات منفكر بعشرين شغلة بوقت واحد
عم فكر بكل هالتفاصيل و بالي مع أيمن.. تأخر اليوم.. ليه يا ترى.. انشالله خير
بعد شوي انفتح الباب و رجع بابا الحبيب و معه مفااااااااااجأة كبييييرررة
العصاافيييررر اللي طلبوهم الولاد من كم يوم
أول ما شافوهم و سمعو التغريد نطو من مكانهم من الفرح
بااابااا شكراا كتييير... الله شو حلوين
ماما ماما تعالي شوفيهم.. شوفي لونهم شو حلووو
و بلشت الشروط بين غزل و كرم..
هاد عصفوري لأ هاد الك و هاد الي
أنا رح طعميهم.. لأ أنا
انت شربهم المي.. لأ انتي
ييي بدينا.. هلأ رح نتفق انو كل واحد فيكم يوم بيطعميهم و يوم بيجبلهم المي..
و بدي خبركم شي حلو..
انو كلما طعميناهم و شربناهم رح ناخد حسنااات..
لأن رسول الله صلى الله عليه وسلم قال " و في كل كبد رطبة أجر"
شو يعني؟ يعني لما نحسن لأي حيوان صغير او كبير رح ناخد أجر و ثواب و حسنات..
زادت فرحتهم و شبكو ايديهم مبسوطين و جابو المي للعصافير..
و نسيو الغدا و نسيو اللعب و نسيو الدراسة و عسكروا عند هالقفص..
خبرت أيمن عن حفلة كرم اللي بدي اعملها...
تطلع بكرم و مسك خدو و ابتسم و قال : و أنا ليه امي ما عملتلي حفلة صلاة عالسبع سنين؟
ابتسمت و قلتله : لانو ما كنت شطور متل كرم.. ما تزعل بابا.. انت بدك أحلى حفلة على هالهدية الحلوة اللي فرحتنا فيها.. الله يسلم ايديك و يخليلنا ياك
لحظات الفرح بتمر بسرعة... بس بتبقى ذكريات حلوة محفورة ببالهم كل العمر..
يُتبع...
نور الأشقر
