بعد الغدا طالعت غزل كتبها و واجباتها و كرت صغير..
دعوة من مدرستها للآباء.. لحضور ندوة عن مواضيع تربوية مهمة للتعامل مع الطفل.. رح تنعمل بمسرح المدرسة.. و الدعوة عامة..
حلو.. خطرلي خبر جارتي سلمى تروح معي.. منستفيد و منتسلى..
اتصلت فيها و خبرتها.. شو رأيك سلمى بهالمشوار ؟
و كأني حكيتلها نكتة :/ ضحكت ضحكت ضحكت و قالتلي.. عن جد رايحة تحضري ندوة عن التربية؟
حبيبتي هدول جماعة التربية مو شاطرين إلا بالمواعظ و كتر الحكي
بيقولولك لا تضربي ابنك و حاوريه و حكي مثالي.. و على فكرة بيكونو كل يوم عم يضربو ولادهم
حبيبتي.. إذا الولد ما أكل كف مرتب على أخطاؤه ما بيتربى.. خصوصاً هالجيل المايع..
بعدين هي نحنا.. لما كنا صغار يااااماا انضربنا و انحبسنا و تربطنا و هي نحنا اليوم ما أحلانا..
اعزميني على مباركة.. على عرس.. على استقبال.. عالسوق.. مو على ندوة !! ههههه الله يسامحك..
سكتت.. و بعدين قلتلها بتصدقي؟ .. انا كنت احكي نفس الحكي..
اي.. و انا كمان انضربت.. بس تذكرت كيف حسيت.. كيف قررت خبي عن أهلي أي شي بيصير بحياتي... خوفا من عقابهم
و هلأ.. ما بدي بنتي تخاف مني و تحكي أسرارها الصغيرة لغيري...
أما " جماعة التربية " فما خصني بحياتهم.. يمكن بعضهم ما قدرو يستفيدو من نصايحهم.. خسروها.. بس أنا.. ما بدي شاركهم الخسارة..
المهم.. لا تتأخري بكرا عالحفلة.. بانتظارك أنا..
خلصنا واجبات المدرسة و بديت أنا و غزل و كرم نحضر هدايا زوارنا الأطفال..
أكياس صغيرة ملونة..
حطينا بكل كيس هدية صغيرة للذكرى و قطع شوكولا و بسكويت و برنامج صلاة ليتشجعو أصدقاء كرم على أداءها
كتبنا أسئلة على قصاصات ورق لنعمل للأطفال مسابقات سريعة و ندخل للحفلة جو اللعب و المرح..
و اجا اليوم التاني..
و استقبلنا ضيوفنا الحلوين.. أكلنا و لعبنا و تجمعو بدائرة كبيرة وقف كرم بمركزها و شرح للأطفال كيف منتوضى؟ و كيف منصلي؟
و انو هلأ هو صار صديق للصلاة و القرآن.. و رح يحاول يحافظ على أداءهم..
عملنا نشاط الأسئلة و الألعاب.. و جو الحفلة و لااا أحلى..
ضحكنا و تعلمنا و تسلينا و فقرة الهدايا طبعا كانت الفقرة المفضلة
شو حلوة الفرحة المرسومة على وجوههم البريئة..
شو حلو نوصللهم المعلومة مغلفة بقالب المرح و ملونة بألوان الفرح..
كان يوم ممتع كتيير كتير.. كرم ما رح ينساه أبدا..
طاعاتنا و أعمالنا الحلوة.. هية أكتر شي بحياتنا بيستحق الاحتفال :)
يُتبع..
نور الأشقر
