مذكرات عائلة٢١

 مذكرات عائلة بقلم نور الأشقر  . 21 . 

أيام قليلة و بتبدا الامتحانات.. الأهالي بهالفترة بيتوترو اكتر من الطلاب نفسهم.. خصوصا للي عندهم تواسع و بكالوريات.. 

و هالتطورات اللي صايرة بالبلد مخليتنا نتوتر أكتر.. 

و لحتى نغير جو شوي حبيت اعمل جمعة لرفقات

 بلمة حلوة عالفطور.. نفرفش و ندردش قبل ما نستنفر للامتحانات.. 

" ألو يا سلمى.. مو مشتاقة لباقي الشلة؟ يلا عم انتظرك الخميس الصبح نفطر سوا و نجتمع عندي بالبيت.. 

عازمة فلانة و فلانة و فلانة وووو جارتنا خالة أم أنس.. 

صحيح انها جمعة صبايا بس هالجارة متل الأخت الكبيرة بحب قعدتها و حكياتها.. "

فرحت سلمى و ردتلي" اييي طبعا بجي و بساعدك كمان " 

اجتمعو هالصبايا الظريفات و بدت الأحاديث تنبع من كل زاوية.. 

جمعاتنا غنية بالمواضيع المتنوعة نحنا النسوان..

ما منخلي موضوع يعتب علينا.. من الجمال للموضة للطبخ للبيت للمدارس للعلاقات الزوجية و الاجتماعية للدين للتربية للصحة و للسياسة أحيانا.. 

أوقات بتنحكى أفكار حلوة و مفيدة.. و أوقات بتنعطا نصائح ما أنزل الله بها من سلطان.. 

عم اتحرك بين المطبخ و الصالون و اسمع كوكتيل الحكي.. 

ـ بنتي صار عمرها سنتين و نص و لهلأ ما كنا نخلص من البامبرز

ـ ييي ليه لهلأ؟ لا انا نظفت بنتي من زمان.. حتى بالليل ما شاءالله عنها 

ـ ليه ابنك لهلأ ما حكى؟ بسم الله عليه.. خديه عالدكتور و تطمني.. 

ـ و الله ابني صاير عسر كتير و مشاغب و كلما صرخت عليه بيضحك.. 

ـ حبيبتي ايدك و الكف و العصاية.. هاد الجيل مايع و ما بيلبقلو الدلال.. لهلأ ابني ما بيسمع الكلام إلا بعد كف أو قرصة 

ـ اااه بنتي تاعبتني.. مالها مزاج للدراسة و لا حاملة هم الامتحانات.. رح تصير طولي و لهلأ روح قلبها تلعب مع الأطفال الصغار.. أبوها قلي هالبنت فاشلة.. أصلا آخرة البنت لبيت زوجها.. شو رح تعمل بالشهادة؟ 

ـ بدي معلمة رياضيات للدروس الخصوصية. بتعرفو شي معلمة شاطرة؟ 

أبشع شي بخليط هالنصايح انها بتأثر فينا كأمهات.. بتخلينا أحيانا نقلق على ولادنا من وهم مو موجود و نقارنهم بولاد غيرنا.. و ناخد تجارب غيرنا اللي يمكن ما تناسبنا و نطبقها على ولادنا.. . و باختلاف الحالات رح تختلف النتائج.. 

كل طفل هو حالة خاصة.. رح نظلمه لو قارناه بغيره.. 

الله سبحانه فاتح لكل واحد من خلقه باب.. و رغبة و ميول و مهارة ... لحتى تتلون حياتنا و تتكامل 

و فشل هالشخص بمجال معين ما بتحكم عليه بإنه فاشل.. يمكن بمجال تاني يكون المبدع البارع المميز

ما فينا نلوم الطير ليه ما بيسبح.. 

و لا نلوم السمك ليه ما بيطير.. 

كلٌّ ميسر لما خُلق له.. 

علماء كبار و مخترعين مهمين.. كانو يعتبروهن فاشلين بمقاييس المدارس و رجعوهن لأهلهم لهالسبب.. لكنهم لحقوا شغفهن و تركو بحياتنا بصمتهم و أساميهن.. 

و ناس مبدعين بتحصيل العلامات العالية.. خلصت مدارسهن و ما استفدنا منهم شي 

و متل النسمة العذبة.. خالة أم أنس بتحاكينا كلمات حنونة و طيبة متلها.. و بتقول.. 

يا بناتي يا حلوات.. يا ربي يفرحكن جميعا بولادكم و يجعلهن قرة عين.. من سعداء الدنيا والآخرة.. 

حبيباتي يا ماما لا تنسو تجددو نيتكن بكللل أعمالكن ببيوتكن و مع ولادكن.. نربيهم لرضا الله و نفع الناس.. كل جيل مجتمع هو تربية الجيل اللي قبلو.. لما شوف حواليي أخطاء الناس بلوم الجيل اللي رباهن قبل ما لومهن.. 

تربيتك الصالحة الهم.. استمرار لاسمك و شفاعة الك يوم القيامة.. و مشروع حياتك الأول.. 

يا بناتي كل أم رح تتعب و تغلط و تمر بمواقف صعبة.. 

نحنا بشر و ما في حدا كامل.. 

بس المهم ما نوقف بمكاننا.. المهم نضل عم نتعلم و نحاول نكون بكل يوم أحسن من اللي قبلو.. 

ادعولهن دائما.. مع كل جهدكن معهم لا تنسو تدعو.. الله ييسر طباعهم و يعينكم على تربيتهم التربية الصالحة...  

نور الأشقر