شرح كامل عن مراحل تنظيف الطفل

 شرح كامل و مفصل لتنظيف الطفل 

مشاركة الرائعةAlaa Aboud   

 امهاتنا الحبيبات ..  

كلنا لازم نمر بتجربة التنضيف وكل يوم في بوست عن هالموضوع رح اعمل بوست خاص وحط فيه كل الأفكار اللي استخدمتها بالصور والفيديوهات اللي كتير بنتي اتشجعت عليهن وحفظتهن لانو عملية التنضيف لازم تكون شغلة ممتعة ومسلية ولازم موبس الطفل يكون جاهز حتى الأم لازم تكون مستعدة نفسياً وتشحن حالها لهالفترة لانو كل ماكانت هادية وصبورة وأخدت الموضوع بمرح وتسلية كل ماكانت النتيجه أسرع وهي و الطفل حيكونو مبسوطين ...

 كتير أمهات بدون مايحسو بيعملو عقدة نفسيه لأطفالهن مشان هيك حنخلي هالبوست مرجع للجميع كل وحدة عملت فكرة حلوة تحطها

 حطيت لوحة بالحمام وكنا نرسم سمايل فيس كل مرة بتعمل بالبيديه ووجه حزين لما بتعمل برة واول فترة كنت حط التوقيت حتى اعرف شو نظامها سهلت علي كتير..  

 جبت الوان الرسم الوجه والجسم وخليناها كمان بالحمام وصرنا طول الوقت نرسم عالايدين والرجلين أحلى وقت كان هاد الوقت لدرجه انو مابدها تطلع وهي الألوان آمنه وبتنمسح دغري بمنديل مبلول

 طبعا اول شي جبت الغيارات الداخلي بشخصيات اللي بتحبها كانت بدها أميرات وهللو كتي ولبستها وفرحت فيهن وشافت حالها عالمرايه انو صارت كبيرة متل ماما وكبينا الحفوضه الى الأبد ..  

 جبت نونية من مذركير هو بيصير نونيه الو كيس مبطن من تحت وبيصير قاعدة للبيديه بس تفتح الاطراف استفدت منه كتير لانو مااضطريت انحبس بالبيت اول تلت ايام وبعدين وقت نطلع حاملته بايدي صغير حجمه وين مابدي بحطه وبتعمل فيه حتى بالسيارة مرة انزركت فتحته وقدمت الكرسي وحطيتها عملت فيه...وبيسهل عالطفل القعدة برات البيت على اي كرسي حمام ممكن ينحط كمان..

 هي علبة فيها أكلات طيبه حطيتها عند الحمام كل ماتقلي نونو ونعمل بتمد ايدها بتاخد شغله وبتفرح بالانجاز هي بعد التصفيق والتهليل والتكبير والرقص 

 في شغله كنت اعملها ساعدت كتير ...احيانا كنت فوت بنتي وماتعمل شي وبس تطلع تعمل على حالها ...افتحو مي بالحمام او استخدمو رشاش على المنطقه بتعمل مساج وبتسهل الخروج ..  

واحيان كتير وقت منروح عالمول وبكون مستعجله وبتطول بنتي دغري برشلها شوية مي بقوم فورا بتعمل مساج وبترخي العضلات لانو الطفل اول فترة بيكون خايف وعضلاته متشنجه..

 وحدة من الأفكار اللي ساعدتني أتأكد انو بنتي فهمانه الموضوع لانو اول فترة خفت تكون لسه مومستوعبه انو صرت اعمل عليها تمثيليه بشرب اللعبه وبفجاة بخليها تعمل عالارض وبشوف ردة فعل بنتي بلاقيها عم تستغرب وتحاكيها للعبه انو غلط نونو مو عالارض نونو حمام وبتاشر عليها انو مابيصير لازم تروحي عالحمام

 نصيحه اهم شي انتبهو على ردة الفعل لما الطفل بيعمل على حاله لازم تكوني هاديه بس حازمة عطي ردة فعل قويه انو شو هاد بس لا تصرخي ولا تضربي ابدا ...خديها فورا عالحمام واشري بايدك وانت عم تحكي نونو هون مو عالارض عيدي الشغله عشر مرات لتستوعب انا لدرجه بنتي اول ماقالت نونو كانت تقول نونو هون مفكرتها كلمه وحدة دليل انو اتبرمجت هي لسه ماكانت بتحكي الا كلمات بسيطة بس من كتر ماكنت عيد عليها وقت تعمل نونو هون بالاشارة عالمكان اترسخت الفكرة وانحفرت براسها.

 المشمعات متل تبع المستشفى مفيدة كتير ممكن تفرديها بالتخت تحت الشرشف مشان التوسيخ دغري بتكبي وكمان باخدها معي اول فترة صرت اطلع حط تحتها بكرسي السيارة منها حتى لوعملت مااتعزب بالتنضيف..

 لوحة مو انا عملتها في وحدة بتعمل انشطة للاطفال بالقماش متل الكتب الهاديه اللي فيها انشطة منتيسوري عامله هالفكرة بس بدهاروقان وشغلتها حلوة وسهلة ممكن يعملها الواحد بورق ملون وتنحط بالحمام..

 روابط لأغاني وقصص مساعدة 

 https://youtu.be/QlpItqzxcGA

 https://youtu.be/DYS9IlwrfDQ

 https://youtu.be/vFAXZU8YFsk

 https://youtu.be/Hr0K7niFDXk

 https://youtu.be/hhzIMSI5eUQ

 https://youtu.be/QlpItqzxcGA

 https://youtu.be/Hr0K7niFDXk

 https://youtu.be/DYS9IlwrfDQ

 https://youtu.be/hhzIMSI5eUQ

 https://youtu.be/vFAXZU8YFsk

 https://youtu.be/H6gKBo1xSO8

 https://youtu.be/nLKjIyQ-Jz0

الاء عبود