مذكرات عائلة ٣٢

 مذكّرات عائلة مع نور الأشقر  . 32 . 

ادّيه نحنا البشر متسرعين بحكمنا عالأمور.. بتخدعنا الصورة الظاهرة لأن المخبى غايب عنا.. 

اللي بيشوف جارتنا قمر من بعيد.. بيقول عنها انطوائية ما بتحب الناس.. منعزلة.. مغرورة.. الدّعوات اللي بترفضها أكتر من اللي بتلبّيها.. 

بس اللي بيدخل لحياتها من جوّا.. بيشوفها اديه بريئة و مسكينة و طيبة و متل العسل..

ياما ناس مخبّا ورا صمتهم قلب أبيض.. 

و ياما ناس مخبيين ورا وجوههم الحلوة شخصيّات مخيفة.. 

بعد فضفضة الصباح اللي باحت فيها بهمومها.. قرّرنا أنا و سلمى نرافقها أكتر.. نطالعها من الغرفة المعتمة السودا اللي حابسة حالها فيها..

" مين فينا اللي ما عندو هم؟ مين اللي خالي من مشكلة مكدرة حياته؟ 

لا تحطي الحزن و تفكري فيه.. لا تسمعي أغاني حزينة.. امسحي دموعك لا تنامي بكيانة.. 

اشغلي حالك بأي عمل خير.. اقرئي كتب و روايات.. 

  العبي مع ولادك كأنّك بعمرهم.. غميضة.. ارسمو  وجوهكن بشكل مضحك.. لا تفوتي على حالك ضحكة تنعشي قلبك فيها.. 

قابلي شي بيزعجك بشي بتحبّيه.. 

المهم.. لا تستسلمي.. 

رح نتشارك سوا بمبادرات صغيرة بالأيّام الجاية.. تسعدنا و تسعد غيرنا.. 

الشيطان بيسعَد بحزن المؤمن.. لأنو بيعرف انو الحزن بيقتل همّتنا ولهفتنا لأي عمل خير 

بخلّينا أشخاص سلبيّين محبطين متكاسلين.. فلا تفرحيه بهالغاية.. "واللي بيشوف بلوى غيره بتهون عليه بلواه" ... 

دائما سلمى و أنا نشجّعها و نسمّعها كلام إيجابي.. نزرع فيها أمل.. نسمّعها قصة حلوة.. نكتة.. مقلب.. مزحة.. لحتى صارت بسماتها تكتر و ضحكتها ترنّ بنغم الفرح.. ☺

من كم يوم.. أخدت كم عرق نعنع قطعتهم من تحت من مكان بروز الورقة و خليتهم بالمي حوالي 3 ايام و بدا يطلعلهم جذور ناعمة صغيرة و بعدها نقلتهم للتراب و حطّيتهم عالبلكون.. 

قمر و سلمى شاركوني التجربة.. كل وحدة على بلكونها و سلمى ضافت عليها و جابت بذور فليلفة و نبتة المليسة.. و الريحان 

و حتى الحلوين الصغار شاركونا و زرعوا معنا البذور.. و زرعوا كمان زرعة الأطفال المشهورة..  حبات العدس و الفاصوليا عالقطن المبلل بالمي.. 

بتعرفو يا أطفال.. 

انو رسولنا صلى الله عليه وسلم كان يشجع دائما انو نزرع زرعة طيبة.. 

" إذا قامت الساعة و في يد أحدكم فسيلة ، فليغرسها " 

ناموا و هنّن حاسّين انهم عملوا عمل كتير حلو و مهم.. و فكّروا انو رح نفيق تاني يوم و نلاقي على بلكوناتنا شجر نعنع و فليفلة و عدس و فاصوليا.. 

فاقو الصبح و ركضو عالبلكون.. ما لقو شي :/ وين الورق و الثمر؟؟!!!! 

يومين.. تلاتة و لسه الزّرعات ما طلعت.. طلع بوادر صغيرة لزرعة العدس  بس وين البقيّة؟ 

" يا روحي يا ماما.. الزّراعة بدها صبر.. طولوا بالكم و استمتعوا بالنبتة شوي شوي ".. 

الحقيقة.. مو بس زرع النعنع و النبات بدو صبر... كل زرع بده صبر.. 

زرع البسمة.. زرع الأمل.. زرع القيم بولادنا اللي نحنا منفكّر انو عم نجتهد و نحكي معهم كتير بدون نتيجة.. لا.. أكيد رح نلاقي نتيجة.. بس نضل مستمرين بالصبر .. و سقاية هالزرعة لبين ما تتفتح و تثمر..

المهم ما نترك أراضي قلوبنا و عقولنا مقفرة.. و لا قلوب ولادنا و عقولهم متصحرة و مهملة.. 

ما نفوّت فرصة لزرع أي بذرة خير مهما كانت صغيرة.. إلا.. و نغرسها :)

يتبع... 

نور الأشقر