مذكرات عائلة ٣٣

مذكرات عائلة مع نور الأشقر   . 33 . 

بتجي الكهربا  بتنقطع المي .. هالثنائي الرائع قليل ما يجتمع ليخلينا نعرف ندوّر وجبة غسيل و ناخد حمّام ساخن و نعرف نكمّل شغلنا..  

 ارتفاع أسعار عم يزيد يوم عن يوم.. و اللي كنا نجيبو مبارح بسهولة.. صرنا اليوم نحسبلو حساب.. 

أصوات الضرب و الاشتباكات مستمرة ما بتنقطع إلا ساعات.. و كل فترة بتزيد صوت جديد.. لنتعرف على نوع سلاح جديد.. آخرهم الطيران.. 

و فوق كل هالمشاكل.. زايد نق الولاد و كتران مللهم و عنادهم.. و زايد وزني أربعة كيلو!!

ـ " ماما.. رفيقي بالمدرسة عندو آيباد بس الو لحالو.. 

ماما بدي اللعبة الحلوة اللي بتطلع بسبيس تون.. 

ماما..  رفيقتي عندها علبة ميك آب لحالها.."

فكرت بفكرة صغيرة يمكن صارت لازمة للولاد.. و الي كمان .. 

عندي علبة فاضية.. رسمت عليها تفاصيل صندوق 

و كتبت عليه " صندوق الحمْد " 

طلبت من غزل و كرم.. و أنا معهم.. نكتب على ورقات صغار.. النعم الحلوة اللي بحياتنا.. 

نعم يمكن ما كنت مقدرتها أو حاسة فيها .. و نعم كتبوها الولاد و فاجؤوني فيها

 الحمد لله انو عندي بابا و ماما و اخواتي

 الحمد انو صحتنا بعافية مو مرضانين

 الحمد لله مدرستنا حلوة و عنا أصدقاء لطفاء

 الحمد لله عنا أكل لكل يوم

 الحمد لله لأنو ماما بتعرف تعمل كيك و بتعطيني بوسة قبل النوم  

 الحمد لله انو عندي موهبة الرسم و شعراتي حلوين  

 الحمد لله عندي تياب بتدفي بالشتا و حرام بيدفيني لما نام 

الحمد لله أخدت 10 بالعلوم و قالتلي المعلمة اني طالب شاطر

 الحمد لله عم نقدر نساعد غيرنا و نهديهم منا فرحة و بسمة

 الحمد لله عاللحن الحلو اللي بسمعه كل يوم و عالمتعة الحلوة اللي باخدها من كتبي 

 الحمد لله عندي جارات ظريفات و طيبات

 الحمد لله عندي أيمن.. و أهلي.. و ولادي

 الحمد لله انو رزقنا نعمة الحمد

بطاقات صغيرة نضيفها لهالصندوق كل ما تذكرنا نعمة أو حسينا فيها.. و لما يتعبّا نطلعهم و نقرأهم كلهم سوا

و نكافئ حالنا بهدية.. بمشوار.. بفيلم نشوفو كلنا سوا حتى مع أيمن.. بأي شي حلو.. 

الفكرة التانية كانت.. حقيبة  

صنعت حقيبتين بطريقة بسيطة من الورق بتشبه المغلّف، 

رسمت رسمات سهلة مختلفة " ورد.. لعبة.. فلوس.. أكل.. تياب.. تلفون.. شوك.. دوا.. مرض.. أصوات شجار.. ضرب و كلمات على ورقات صغار و وزعتهم عالحقيبتين 

كل حقيبة لشخص واحد  بتمثل نصيبه من حياته.. 

الحقيبة كل مرة بيظهر عليها من ورقاتها شي.. مرة الورد و مرة الشوك.. 

يمكن ما عندي بحقيبتي ورد.. اشتهيت الورد اللي بحقيبة صديقي.. بس ما كنت بعرف انو بحقيبتي في أكل و هو ما عندو.. 

حسدتو عالشي اللي ناقصني.. 

و غمضت عيوني عن شي مهم.. موجود عندي و ناقص عنده.. 

أوقات النعمة بتكون فكرة.. مبدأ منآمن فيه.. غالي كتير و مو مقدرين قيمته.. 

منمد راسنا لحقائب غيرنا.. بيلفتنا بريق الشغلات الحلوة فيها..  بس ما منعرف اديه في بحياتهم ألم يمكن ما نتحمّله.. و حقيبة تقيلة ما نقدر نحملها و لا نتحملها 

فكرة عدّ النعم ما رح تلغي إحساسنا بالمؤلمات اللي بحياتنا.. بس بتخفف من حدّتها.. و بتشغل البال و القلب بالجانب الحلو اللي فيها.. 

فكرة عد النعم للولاد بس لحتى نعوّدهم يكونو شاكرين.. و إلا.. ما فينا نجمعهم كلهم..

" و إن تعدّوا نعمة الله لا تحصوها.. "

صدق الله العظيم 

يتبع... 

نور الأشقر