كيف يتحمل الدب القطبي البرد القاااارس
كتير بيتبادر لأذهان أطفالنا لما يشوفو منظر الدب القطبي على التلج عم يلعب و ينام و و و
أنو كيف ما بيبرد
كيف بيتحمل كل هل البرد
تجربتنا اليوم فيها معلومة حلوة ما رح ينساها الطفل كل حياتو خصوصي لما يطبقها و يحس بالشعور بنفسو .
نحتاج إلى
وعاء فيه مي و قطع تلج
كفوف نايلون (إذا ما توفرت ممكن نستخدم كياس نايلون عادية)
علبة سمنة (رح نحتاج لكمية كبيرة بس ما حيصرلها شي إن شاء الله بآخر التجربة حنرجعا للعلبة صاغ سليم ).
مطاط للتثبيت
إلى التجربة
بالبداية رح نطلب من الطفل يحط إيديه بالماء المثلجة و نشوف قديه بيقدر يضل مستحمل برودتها .
أكيد رح يشعر بالبرودة الشديدة و يقيم ايديه بسرعة .
الخطوة التانية ح يلبس الطفل كفوف نايلون و حنخليه يغمس ايدو بالسمنة و لازم تتغطى ايدو من كل الجوانب بكمية كبيرة .
بعدا منلبسو كيس تاني فوق السمنة و منربطو بمطاطة للتثبيت .
الخطوة التالتة و الآخيرة ..حيرجع الطفل يحط ايدو بالماء المثلجة و ح يلاحظ أن ما عاد حس بالبرودة أبداً أبداًً و بيقدر يخلي ايدو بالمي طول اليوم اذا بدك
طيب شو علاقة هل الشي بالدب القطبي و البرد ؟
زود الله سبحانه الحيوانات يلي بتعيش بالأجواء الباردة جداً عدة وسائل لتحميها من البررررد
و من بين هل الوسائل (الدهون ).
وأجسام هل الحيوانات مغلفة بطبقة من الدهن بتمنع وصول البرودة إليها .
سبحان الله
و السمنة منرجعها للعلبة نضيفة و ظريفة و لا مين شاف و لا مين دري
و إذا عندك اكتر من ولد بتقدري تقيمي الكيس بكل سهولة من ولد و ترجعي تلبسيه للولد التاني
داليا المصري
