الرسالة السرية بالحبر السحري
مجرد ما نقول جملة للولاد فيها شي ((سحري)) بتلاقيون انشدوا و اندمجوا معك للنهاية ..ألوان سحرية ... قبعة سحرية ... قلم سحري ...
اليوم رح نقلون عن حبر سحري ممكن يكتبو فيه رسالة سرية و ما حدا بيقدر يعرف شو مكتوب فيها إلا اذا تابعنا بتجربتنا السحرية لليوم
رح يكون عنا طريقتين ممكن تختاروا الطريقة يلي بتناسبكون ع حسب عمر أطفالكون .
الطريقة الأولى منحتاج فيها ل :
عصير ليمونة
ورقة بيضاء
عود قطني أو ريشة ألوان
عصير الليمون هو رح يكون حبرنا السحري لليوم و رح نخلي الأطفال يكتبوا و يرسموا عل الورقة يلي بدون ياه بواسطة العصير
بعدا مننتظر لحتى ينشف الحبر تماماً من على الورقة.
و لحتى نقدر نكتشف شو مكتوب بالرسالة لازم نقرب الورقة من أي مصدر حراري متل لمبة ، مكواة ، شمعة .(وجود الأهل ضروري أثناء تطبيق التجربة)
فجأة رح تبدأ الكتابات و الرسومات تظهر بشكل واااضح جداً
و هاد الشي بيعود لتأكسد عصير الليمون بفعل الحرارة و تحوله للون البني .
الطريقة التانية منحتاج فيها ل :
لون شمعي أبيض و ألوان مائية
هي الطريقة سهلة و سلسلة كتير خاصة للأطفال الأصغر سناً .
ممكن يكتبوا رسالتون السرية باللون الأبيض الشمعي و بعدا بيلونوا فوقها بالألوان المائية العادية و بالتالي بتظهر رسومات الأطفال و خربشاتون .
كل المتعة و التسلية بتمنالكون ياه مع أطفالكون
لا تنسوا تشاركونا بصور رسائل أطفالكون السرية
و انتوا كمان كتبولون رسالة سرية و خلوهون يتفاجئوا بمحتواها .
داليا المصري
