تجربة الكولا
اليوم رح أحكي عن الكولا المشروب يلي للأسف معظم الناس بتأمن تفوتو على بيوتا بشكل مستمر .
كلياتنا منعرف ضررها و اليوم ما رح احكي عن كمية السكر يلي فيها، و لا عن شو ممكن تعمل بجسم الانسان من زيادة وزن و غيرا و غيراتا ......
اليوم رح احكي عن الكولا و شو ممكن تعمل بأسنان ولادنا .
تجربة بسيطة كتير و عملية و رح تخلي ابنك يقلك لحاااالو ماما انا ما بقى بدي أشرب كولا
نحتاج الى :
بيضة مسلوقة ( لو كان عندك اكتر من ولد سلقي بيضة لكل ولد
كولا🍷
فرشاة أسنان
معجون أسنان
هي التجربة بتحتاج لوقت فالأفضل نعمل التجربة بالليل و نشوف النتائج تاني يوم الصبح .
أول شي رح نسلق البيض ( ممكن الولد يكتب اسمو على البيضة بقلم رصاص )
تاني شي رح نتخيل أن البيضة هي أسناننا .
لأن قشر البيض بيحتوي تقريباً على ٩٠٪ من الكالسيوم النقي ، تقريباً مطابق للكالسيوم يلي بتتشكل منو العظام و الأسنان .
تالت شي رح ننقع البيضة بالكولا و ننتظر لتاني نهار .
الصبح حينصدموا الولاد لما يلاقوا البيضة صار لونا بني
بتعرفوا أن نفس الشي رح يصير بأسناننا لما نشرب كولا
طيب شو الحل ؟؟
رح يجاوب الأطفال أنو نفرشي أسناننا.
و بالفعل رح ننتقل للخطوة التانية و نجيب فرشاية و معجون أسنان و نبدا نفرشي البيضة يلي هي بتمثل أسناننا ...
حنلاقي أن اللون البني صار أفتح بس ما اختفى
و قد ما فرشيناها مستحيل ترجع البيضة للونا الأبيض الحلو .
مشان هيك الكولا مو بس رح تتسببلنا بتسوسات بأسناننا بفضل كمية السكر الرهيبة يلي بقلبها
كمان رح تغيرلنا لون أسناننا الأبيض الصحي و يصير لونون بشع كتير .
حتى لو شربنا الكولا لازم نشربا ع فترات متباعدة كتير و فوراً فوراً لازم نفرشي أسناننا بعدا و إذا كان صعب علينا نفرشيون (مثلاً لو كنا بشي مطعم ) لازم على القليلة نتمضمض و بس نرجع عل البيت فوراً نفرشيون .
بتمنى من كل قلبي كل بيت يطبق هل التجربة لنوعي ولادنا لخطورة الكولا و شو ممكن تسببلنا
شكراً كتير لتفاعلكون و دعمكون و دمتم بصحة و عافية و أسنان بيضاء صحية
داليا المصري
