مذكرات عائلة ٣٥

مذكرات عائلة . 35 . و الأخيرة من الجزء الأول

عادة لما بواجه صعوبة معينة مع ولادي.. ببحث بالنت عن هالمشكلة و طرق حلها.. أوقات بستفيد من بعض الأفكار

و أوقات بحس اني فتحت مواقع كوكب المريخ..!

أو شي كوكب مثالي.. مقال منمّق بجنبه صورة الأم المبتسمة اللي حاملة ابنها.. و هو التاني مبتسم و لطيف و بيشهي الولاد..

يا أما بلاقي حلول قابلة للتنفيذ بكل مكان إلا ببلدنا

بشكل لا شعوري بقول بقلبي " انتو وين و نحنا وين!! " :/

أو بشوف إنجازات و صور لامعة لصبايا ظريفات كمان من بلدنا.. من جهة بفرح و بفتخر فيهم انهم عاملين شي منيح..

و من جهة تانية بيصيبني إحباط :( .. أنا ليه ما عم اقدر اعمل شي مميز؟ حاسة كل الأمهات أحسن مني!

يا ترى كيف بيلحقو؟ كيف بيوازنوا بين البيت و الولاد و الشغل و التطوع؟

معقول ولادها ما بينقو و بيتخانقو متل ولادي؟

أكيد عندها ولد واحد بس..

يا ترى زوجها داعمها؟ و لا مو سائل عليها؟

ايمتا بتفيق؟ ايمتا بتنام..

هاااه أكييييد عندها شغالة ..

بسبب تدهور أحوال البلد حوالينا بشكل متسارع.. الخوف.. الظلم.. القلق..الضرب اللي ما عم يعرف يوم عطلة و لا يوم عيد و لا هدنة..

اخي اللي بدو يسافر.. :(

أيمن اللي صاير الحكي بيني و بينو مختصر مفيد..

شارد و مهموم..الغلا اللي عم يدبحنا على مهل..

حالات الخطف اللي كترانة..!

بسبب هالمشاعر المكركبة حاسة انو ما لي خلق اتفاءل و كون السوبر ماما مع ولادي.. ولا حابة ساويلهم أنشطة..ولا اشتغل

أصلا صايرة ما عم اتحمل خناقاتهم و صراخهم و عم فش خلقي لما خانقهم أوقات.. و اخلص من النق بجملتين بصوت عالي..

متدايقة.. مو من سبب معين.. هيك محبطة و بس.. :(

حابة بوح لحدا.. فضفض..

تجرأت و راسلت وحدة من هالصبايا..

ما بتعرفني.. و أحيانا منحب نفضفض للي ما بيعرفونا..

سألتها.. و قلتلها اديه حاسة بإني أم عم تفشل و عم تحس بالإحباط.. و كان جوابها على غير ما توقعت..

" قالتلي.. اي.. و انا متلك.. مو دائماً مبتسمة و شايفة الدنيا وردية.. و لا دائماً بنجح..

بالآخر كلنا في بحياتنا مشاكل و معوقات

ولا نمت و فقت و لقيت حالي بالصورة اللي شايفتيني فيها..

أول شي بدك تعمليه.. انك تلغي كلمة " أنا ما بقدر" من قاموسك حتى لو كنتي شايفتيها عالواقع.. قولي أنا ناجحة حتى لو حسيتي انك عم تكذبي على حالك

التغيير بيبدا بأقلللل التدريج..

يعني على "نظام الربع ساعة"..

كيف يعني؟

يعني لا تخلي الروتين يقتل حياتك.. خدي من يومك ربع ساعة فقط.. حاولي تحافظي عليها كل يوم.. تعملي فيها شي مالك محافظة عليه من قبل..

تقرأي فيها كتاب.. تلعبي رياضة.. تقرئي قرآن.. تتعلمي وصفات لمطبخك.. اي وصفات... تتعلمي فيها أي شي..

تقعدي فيها مع ولادك.. مو شرط تعملوا شي.. بس افتحي أي موضوع و اسمعيهم و شوفي كيف بيفكرو..

أما ساعة الحزن و الإحباط.. عامليها متل ساعة الغضب.. تركيها تمر بصمت و تخلّصي منها..

بتعرفي الحديث النبوي إذا غضب أحدكم فليصمت؟ لأن عقله بيكون مشوش.. و الحزن نفس الشي.. قلب مشوش..

شوي ورا شوي رح تلاقي الفرق.. و الاستعانة بالله طبعاً أساس كل شي..

نحنا أحيانا منخدع حالنا انا متوكلين على الله.. هيك بصورة عامة.. بس ما منستشعر هالفكرة بإيمان

مننسى نصلي ركعتين نختمهم بأيادي مرفوعة و بدعاء حقيقي يطلب من ربنا العون.. نشعر بحلاوة الخشوع وكأنو ما في حدا بالكون غير انتي و ربك سبحانه.. و كأنو كل الدنيا صارت تفاصيل صغيرة بخلفية المشهد..

مع انو هو سبحانه بنفس الوقت سامع الكل.. و شايف الكل..

شكرتها و سكرت المحادثة..

نزلت اتمشى شوي.. الدنيا برد.. بس بدي شم هوا نظيف..

شوي و صارت تمطر بزخات خفيفة..

رفعت راسي و غمضت عيوني و صارت الزخات تنقط على وشي متل مسحة الرحمة..

مو بس لامست وشي..

لامست قلبي كمان..

يا رب..

استعنّا فيك.. لو ما عم نقدر نرفع عنا ظلم الناس، ساعدنا نرفع ظلمنا عن أنفسنا..

بضعفنا و بقوتنا.. ما لنا غيرك يا الله..

" الأخيرة من الجزء الأول "

تم بحمد الله في :