تجربة الميزان
غراض كتير رح تصف ع الدور حتى يزينوها الولاد
تجربة الميزان مناسبة من عمر 4 سنوات
فيها حيتعلم الطفل و يكتشف أنو كل شغلة الها وزن مهما كانت صغيرة .
ممكن تكون خفيفة و ممكن تكون تقيلة و الميزان هو يلي حيساعدنا لنكتشف هل الشي .
نحتاج إلى :
كاستين ورق أو كرتون .
خيوط
عليقة
ألعاب أو أشياء صغيرة الحجم .
أوزان (انا استخدمت قطع نقدية )
ورقة و قلم لتسجيل النتائج .
أول خطوة بصنع الميزان هي قص خيطين بنفس الطول و منعمل ثقبين بكاسة الورق و منثبت الخيط فيها منعلق الكاسات على العليقة و هيك بيكون الميزان جاهز .
رح نحط لعبة صغيرة بكفة الميزان و نحط مقابلها الأوزان بالكفة التانية .
أنا استخدمت قطع نقدية ، حسيتا كتير مناسبة لتكون وحدة لقياس الوزن .
بس ممكن انتو تستخدمو أيا شي تاني بتحسوه مناسب (ممكن حبات فاصولية، أزرار متماثلة ،او حتى حبات ال m&m ).
مثلاً حطينا سيارة صغيرة بكاسة و بالكاسة التانية منبدا نحط الليرات وحدة وحدة و منشوف كم ليرة منحتاج نحط بالكاسة التانية لحتى يتوازن الميزان؟
ومنسجل النتيجة على الورقة ..
و بعد كذا محاولة ممكن صير اسأل الطفل
أيا اتقل الأميرة و لا الحصان ؟
كيف عرفت ؟
طيب...
السيارة =٤ ليرات
و الحصان =٤ ليرات شو يعني ؟؟
طيب تعالو نجرب نحط الحصان بكاسة و السيارةبالكاسة التانية لنشوف شو بيصير ؟؟
معلومات كتييير رح ياخدا طفلك من هل التجربة و حتلاقيه عم يلاحظ و يسجل و يراقب و يجرب مرة و مرتين و تلاته.
كتير استمتعوا ولادي بالتجربة و حبوها بتمنى تستمتعوا فيها و تحبوها أنتو كمان .
داليا المصري
