فكرة جديدة اقترحتها عليي لينا " رفيقة الحديقة " قرأتها بكتاب و حبت تطبقها معي..
" أسابيع مميزة "
رح نختار كل أسبوع فكرة وحدة و بس.. نحكي عنها و نطبقها و نبحث عنها..
و بآخر الأسبوع رح نشوف نتائجنا سوا مع ولاد لينا..
عملنا أسبوع الكلمات الطيبة..
رح نحاول بالأسبوع ما نحكي أبدا أي كلمة مو حلوة..
غزل ما رح تنسى تقول لستها كل يوم شكرا يا تيتة عالطبخة اللذيذة.. 😋
و كرم ما رح يقول أي كلمة غير مؤدبة لعمار " ابن عمو مهند.." حتى لو تخانقو سوا و حتى لو عمار شاغب و عصب.. و يمكن هاد كان هو الجزء الأصعب..!
كمان رح ننتبه للكلمات الحلوة اللي منسمعها حوالينا من أهلنا أو رفقاتنا أو حتى بالتلفزيون..
هالطريقة بتعزز التركيز على فكرة وحدة و التفكير فيها بشكل مستمر..
الأسبوع اللي بعدو عملناه أسبوع الاكتشاف
كلنا رح نبحث عن معلومات علمية جديدة.. من الجريدة و المجلة و النت..
حتى حلا الصغيرة رح تشاركنا بالبحث عن الأشكال.. المربعات و المستطيلات و الدوائر.. تبحث عنهم بالبيت و الحديقة و تدلنا عليهم..
كرم بحث معي عن أنواع من الطيور و سرعة طيرانها..
غزل جابتلنا معلومات عن أكبر الحدائق بالعالم..
أماني " زوجة مهند" ما راقتلها الفكرة كتير
:/
ابتسمت ابتسامة باردة و قالت.. " ما شاءالله شو فايقة و رايقة
:/
"
لكن مع هيك هي كمان شاركتنا بمعلومات صغيرة عن أكبر شلالات موجودة بكندا ..
:/
مو كل الأسابيع كانت جدية.. كان في أسبوع المرح.
ندور فيه على أخبار طريفة و مواقف مضحكة..
بعضها موجود بالقصص و بعضها بمقاطع كاميرا خفية على النت او التلفزيون..
صحيح شفنا بعض المقالب مترافقة مع صوت الرصاص و القذائف اللي ورانا..
بس مع هيك.. أكيد.. كان هاد هو الأسبوع المفضل عند الولاد
نوعاً ما.. كسرنا الملل و القلق اللي كنا فيه بآخر فترة.. و وجهنا تفكيرنا بعيد شوي عن أخبار الهجرة و النزوح و القذائف و القصف و التصريحات الكاذبة للدول اللي عم تلعب فينا..
بالليل بعد ما نامو الولاد..
طلب مني أيمن ننزل نتمشى تحت..
ماشي و ساكت متل اللي مخبي سر..
ـ أيمن عم تفكر بشي؟
ـ اي.. بدي خبرك بموضوع بس ما بدي أي حدا يعرف فيه..
ـ خير شو في
ـ أنا عم اشتغل بمعاملة لنسافر لكندا
ـ وقع على قلبي الخبر متل المي الباردة!
تفاجأت..!! كندا!!!
ليه لشو السفر
و ليه لكندا.؟ كتير بعيدة.. ليه مو لشي بلد عربي؟
ـ ريحان ما عم تسمعي الناس؟ مين الدولة العربية اللي ميسرة سفرنا لعندها؟ و أي مستقبل رح نلاقي فيها ؟
و لا مصدقة انو مشكلة البلد رح تنحل بقمة فاشلة أو اجتماع مزيف؟
بس أرجوكي ريحان.. ما بدي امي تعرف.. بيكفيها هم سفر أخي.. بعدين المعاملة لسه بتحتاج أكتر سنة و يمكن ما تظبط.. فما بدي نعيشهم بهم و وحشة من هلأ..
ـ شو فيي قول؟ الله يخترلنا الخير و يعيننا على هالأيام الصعبة
يتبع..
