قديه كلمة الوطن كبيرة ؟
أحيانا هالكلمة تختصر بكلمات تانية.. ببيت صغير.. بيتي اللي بشوفو أحلى من أي مكان..
بيتي اللي بكون فيه حرة.. عم ربي ولادي بدون تدخل حدا.. عم احكي فيه مع زوجي بدون آذان تسترق السمع..
يعني شو الوطن بلا بيت..؟؟
أنا حسيت بهالمعنى بعد ما بعدت عن بيتي.. و اليوم حسيت بطعم كلمة وطن لما رجعتله و الحمد لله بعد ما خلصنا تصليح الأضرار..
الولاد طايرين من الفرح..!
بآخر فترة حسهم متوترين..مختلف عليهم نظام النوم.. نظام البيت.. خناقات يومية مستمرة مع ابن عمهم..
أكيد حاسين بنفس شعوري..
و أكيد كانو مفتقدين البيت و الوطن متلي..
بس الطفل ما بيعرف يعبر.. لأنه لسه ما بيملك كل المفردات بذهنه..
أحياناً بيعبر بالشغب.. بكسر الألعاب.. بالتقصير بدروسه..
بعصبية زايدة شوي.. بافتعال المشاكل..
أحياناً بيعمل غلط و هو عرفان انو غلط.. بس بيكون عم ينفس عن شعور كبير مضغوط بقلبه الصغير و مو عارف كيف يتخلص منه..
و أحيانا حل المشكلة ما بيكون عقاب و توجيه و أوامر..
أحيانا بيكون حلها ضمة حنونة و دردشة صغيرة.. خبره فيها اني بعرف انو هو معصب او مزعوج..
و أنا كمان متلك بعصب أوقات.. بس رح نحاول لما نكون بحالة غضب إنا ما نزعل اللي بيحبونا.. رح خبره اني بوثق فيه و بعرف انو بيحبني و ما بيزعلني..
أنا لازم اتذكر هالشي دائما.. و حس بشعورهم حتى لو ما حكوا..
لازم كمان اتذكر اني وياهم مو عايشين ظروف طبيعية.. و لا ببلد طبيعية.. و اللي عم يصير فيها أسوأ من كل شي مر عليها..
ولادي كمان هن وطني.. و بعيونهم بشوف وطني الجديد اللي بتمنى تكون سماه صافية.. بلا نار.. بلا قذائف و صواريخ..
أيمن.. زوجي و سندي.. صح هو هالفترة مهموم و شارد و ما كنا عم نحكي كتير.. مشغول عني غالب الوقت.. بس كمان بشوف بقلبه معنى الوطن..
أهالينا و حبايبنا.. الأماكن الدافية اللي بتحضننا.. شو معنى الوطن بلاهم؟ الله ما يحرم منهم حدا..
مريت عالجيران و سلمت عليهم..
مريت عالناس اللي وصتني فيهم سلمى..
على خالة أم محسن.. و على سعد..
اشتريت كم غرض ناقصين للبيت بضعف السعر اللي كان من شهرين !
الفاصوليا صارت تعتبر أكلة فاخرة و غير متوفرة للجميع .!
أسعار البسكويت و تسالي الأطفال صار بدها ميزانية لوحدها..
ما بعرف العالم كيف عم ياكلو و يشربو بهالغلا.. يا رب تكون مع كل مسكين..
بالليل اتصل فيي أيمن و قلي مو قادر يطلع هلأ من الصيدلية لأنو برا في اشتباك قوي
انقبض قلبي و خفت عليه و استودعته بحفظ الله.. بعد نص ساعة خبرني انهم هديو و راجع مسافة الطريق..
تأخر بعدها أكتر من ساعة و شعلت بقلبي نار و أفكار
وينو؟؟
ليه ما عم يرد ؟!!!
رد بعد الاتصال العاشر و بقي ساكت..
بكيت و ناديتو
ـ أيمن رد عليي!!! انت بخير؟؟
رد بصوت خافت..
ـ اي أنا عايش..
بس.. " تنهد" .. راحت الصيدلية !!
خبيت شهقة قلبي و دموعي عنه..
ـ خير انشالله خير.. المهم انت سالم يا فداك الدنيا كلها..
:(
عم سجل هاللحظات بمذكراتي بدموع متل اللي نزلت مني لحظتها.. و عم شد عالقلم متل ما شديت على قلبي..
بنفس اليوم اللي منرجع فيه للبيت.. منخسر فيه الشغل..
صرنا منشبه المتصارعين بحلبة المصارعة.. ما منلحق نجمع شتاتنا و نستجمع قوتنا و نوقف على رجلينا.. إلا و بتجينا ضربة تانية موجعة بتطرحنا بالأرض ..
ما عم نقدر نقوم منها إلا بالإيمان و الصبر..
مدنا بقوة من عندك يا رب..
و اكفينا شر عبادك..
و عطينا بإيماننا فيك.. وطن...
يتبع..
.