8/01/2016

مذكرات عائلة 2 "15" أمل حياتي



بفهم شو يعني الرجل يكون أب و زوج بهيك ظروف.. و بهيك بلد.. 
إحساسه بالمسؤولية عن عيلته.. عن مستقبل ولاده


كيف بدو يقود هالمركب و يقدر يحميه من بحر الخطر و الغلا و الحرب و الضيق.. 

كيف بدو يستوعب خسارة بيته و مكان عمله و راحة باله
الضغوط اللي عم نعيشها بتبرد أدفى شعور و بتضعف أقوى العلاقات.. و لو انو مطلوب يصير العكس 

كتر ضغط الشغل على أيمن لحتى يتدارك الخسائر اللي مرينا فيها.. ما عدت شفتو منيح.. و لما يرجع للبيت فأغلب وقتو بيكون مع أهله و من قناة أخبار لقناة أخبار
متمنية قضي معه نهار.. او ساعة نحكي فيها لحالنا 😢

عم حاول نبقى عيلة متماسكة و النا أوقاتها الخاصة فيها..
وقت نجتمع فيه بهالغرفة و نحكي فيه سوا..
عشر دقايق قبل نوم الولاد تكون مجرد دردشة مع ابوهم..
كل مرة بحاول ضيف شي جديد..
مرة بنجح..
و مرة بتصعب الأمور..
مرة بتناسى و بقول " ريحان كبري عقلك.. مو شايفة الحرب؟ هلأ وقت الحب و الاهتمام؟!!!"
و مرات بقول " اي.. اي هلأ هلأ وقت الحب و الاهتمام"
آخر فترة صاير أيمن بعيييد عني بعيييد..
حاولت فضفضلو ما عم لاقي وقت مناسب... اخدت ورقة و صرت اكتب 

" أيمن..
أنت و أنا عنا نفس الهم.. و عايشين بنفس البلد.. و حاملين حمل مو سهل..
بس ساعدني.. خليك معي..
أنا ما بدي رومنسيات.. ما بدي أشعار و أغاني .. ما بدي تفاجأني بهدية..
ما بدي تشوفني و تقلي ياااه متل القمر.. ما بدي لا ورد و لا عطور..
بدي شغلات أصغر بكتير.. بس أهميتها عندي أكبر بكتير من ما تتخيل..
بدي تصبرني..
بدي تقلي رح تخلص هالأيام الصعبة..
بدي بآخر النهار تمسح جبيني و تقلي الله يعطيكي العافية..
بدي تقلي رح نبقى سوا مهما بعدنا و انشغلنا..
بدي تقول هالكلام لولادك كمان..
بدي تسامحهم على علاماتهم السيئة يلي جابوها هالفصل 😢

تحتويهم أكتر..
بيصعب عالطفل تغيير جو مدرسته..
كيف لو تغير معها بيتو و مكانو و صحابو؟
تفهّمهم.. ضمهم.. قلهم انك حاسس فيهم و بالصعوبات اللي واجهتهم.. و تأمل معهم نتائج أحسن بالفصل اللي جاية..
أيمن..
وجودك معنا سند و دعم و حضن و حماية.. مو بس للولاد و الي كمان..
فيك بقوى و بزيح الشوك من طريقنا الصعب..
بحنيتك بنسى تعبي و بنسى انشغالك..
بدي لهفة تترجم بكلمتين.. بس كلمتين.. تقلي الله ما يحرمني منك..
أنا بعرف انو الأب بيترجم محبته بالعمل.. بس الأم بتضل عطشانة لكلمة منو.. للهفة.. لمسكة ايد تخبرها انو شريكها معها..
تفاصيل صغيرة انت يمكن ما تشوف الها قيمة..
بس أنا كأم.. كزوجة.. لا تبخل عليي فيهم..بحتاجهم كتير لحتى اقوى على تعبي و كمل طريقي..
الله يخليك و ما يحرمني منك.. "
سكرت الورقة و نويت اعطيه ياها لما يرجع من الشغل او لما يروح تاني يوم الصبح..
انتظرته... تأخر كتير..
اتصلت فيه رن و ما رد..
مرقت ساعة.. ساعتين.. و شعلت بقلبي نار..!!!!
حماتي تمسك وجهها مرة و تفرك ايديها مرة و تروح و ترجع على طول الغرفة و تنادي يا ربي دخيلك وين راح..!! ؟
استقبلنا اتصال من أحد الفروع يبلغونا انو معتقل!!
معتقل!!! ليه!! شو التهمة..!!
التهمة انو موصل أدوية لجهات إرهابية!!!
إرهابية!!!
يعني مو بالغلط و لا تشابه أسماء!!
وقعت بأرضي..من وين طلعت هي الجهات الإرهابية!!
مستحيل أيمن يعمل هيك!!
كان عم يخبرني دائما عن كل عيلة بيوصلها تبرع أدوية عن طريقه!
اختنق الكلام بحلقي.. ايدي صارو تلج و وجهي نار
و حسيت ما بقى بعروقي و لا نقطة دم 
ما قدرت خبي ضعفي عن الولاد
خبيت وجهي و صرت ابكي..
كرم يسألني شو يعني اعتقال؟ يعني متل عمو أبو سليم.؟
و غزل.. غزل تقلي ماما تذكري شو علمتيني قول لما خاف.. " يا رب انت حسبي.. بتوكل عليك"
ناديت بسري.. يا ربي ترجعلي ياه بالسلامة.. مااا بدي منو شي.. بس يضل موجود معنا 😔 و ما ننحرم قربه
تركت الولاد مع حماتي و رحت مع اخوه و عمي للفرع
و كانت أسوأ ليلة قضيتها بحياتي..!!
يتبع..