مذكرات عائلة 26

  مذكرات عائلة    *26*

يا ربي شو هالزمان!!
الوقت ما فيه بركة ؟ و لا نحنا اللي ما عم نعرف كيف نقضي ساعاته ؟
عم تطير الشهور و الأسابيع طيران.. الله يبارك بأوقاتنا و بأعمارنا يا رب..

حاطة راسي على هالمخدة و النوم مخاصم عينيا :/
خبر مزعج سمعتو اليوم عن طبيبة ساكنة بحارتنا.. توفت برصاصة طايشة..
يا الله!!  لساتها صبية.. الله يصبر أهلها.. :'(
يا ربي كيف هيك الواحد بيتأمل يعيش سنييين و سنيين.. و فجأة.. بثواني..  بينتهى كل شي.. :'(

شو صار بولادها؟ مين رح يربيهم؟  الله يلطف فيهم..

اليتم..
أكتر معاناة بتوجع قلوبنا.. لان كلنا منعرف اديه الحياة مرة لما تكون بدون " أم" ..

خطرتلي فكرة..
انزل عالسوق و اشتري هدايا صغيرة و غلفهم و نزور مع ولادي مأوى الأيتام القريب منا..
بلكي منقدر نرسم على وجوههم بسمة على هالعيد..
و بتبقى ذكرى عند الولاد.. انهم عملو شي منيح..

من تاني يوم الصبح.. خبرت ولادي بالفكرة..
تحمسو كتير  و فورا نزلنا عالسوق و اشترينا الهدايا و الأكلات الطيبة.. و ساعدوني بتغليفهم..

لا و عم يتناقرو مين بدو يحضر هدايا أكتر!!

من وين اجت هالهمة ما شاءالله؟. :/  بالعادة بعيد الطلب عليهن عشرين مرة ليتلبى :/

نفخنا كوومة بوالين و اتصلت بسلمى قلتلها تعالي احملي معنا و كسبي ثواب..

جهزنا.. و رحنا للمأوى..
ولاد ولاد ولاد.. كبار صغار من كل الأعمار..
سمحتلنا الإدارة ندخل لغرف معينة و لفسحة المأوى

عم حاول كون طبيعية و مبتسمة.. لحتى ما يحسو بالشفقة.. بس من جوا قلبي عم يقطر دمع  و يدعيلهن الله يحنن عليهن عباده :(

عم قلّب نظراتي بينهم و بين ولادي اللي عم يهدوهم الهدايا.. و حس بالفرحة بعيون ولادي يمكن أكتر من فرحة هالأيتام الحلوين نفسهم..

سبحانك يا رب.. العطاء لذة بتزيد عن لذة الأخذ...
يمكن لأنها بتوافق الفطرة الطيبة فينا..
و يمكن لأنا منشعر بالثواب الكبير اللي بيكرمنا فيه ربنا مع كل ذرة عطاء مهما كانت صغيرة..
حتى لو كانت مجرد ابتسامة :)

مضينا هالساعتين و رجعنا عالبيت و ولادي طايرين من الفرح.. 

بيقلي كرم.. " ماما انا لما صير كبير و اشتغل يصير معي مصاري كتير.. بدي اشتري دائما هدايا للأطفال و خليهم فرحانين متل اليوم "..

و غزل قالت.. :" و أنا رح اكتب قصص حلوين و ساوي مكتبة للأطفال يقدرو يقرؤوا فيها القصص من دون مصاري "..

يا حبيباتي الله يجعلكم من أهل الخير و الرحمة و يمد بعمري لإحسن تربيتكم..

يمكن هالمشوار ما بقا ينتسى..
و نفعنا أكتر من عشرين درس عن الكرم و العطاء و حب الغير..

على تسارع الوقت.. حسيت هالنهار طويييل مع هالمشوار..
فعلا متل ما بيقولو..
العمر لحظات..
و بعض اللحظات عمر...!!

يتبع

نور الأشقر