مذكرات عائلة 2 ـــ 21

أحيانا أنا بعمل أخطاء صغيرة.. ما بعيرها اهتمام.. بتجاهلها و ما بتخليني حس بذنب.. 

لكن من جديد.. و بعد بعض المواقف.. انتبهت انو هالنظرة غلط..

يعني.. مو العبرة دائما بحجم الخطأ.. إنما العبرة بتأثيره

نقطة نفط قادرة تفسد حلة حليب كاملة

كلمة صغيرة بتكسر خاطر و كلمة صغيرة بتجبره..

انتبهت مؤخرا انو كرم عم يقارن حالو بأغلب الأطفال اللي بعمره.. 

سامي ابن عمه.. أكله غالبا قليل.. و لو كمل صحنه الكل بيشجعه و بيهتفله.. 

قرب مني كرم.. شبك ايديه لصدره.. تكتف بغيظ و قلي.. 

" ماما أنا دائما بكمل صحني.. ليه ما بتصفقولي متل سامي ؟ "

" ماما و أنا كمان ما بفتح خزانة تيتة "

" و أنا كمان ما بنط على الكنبات.. "

و أنا.. و أنا.. و أنا...

فعلا.. صحيح أنا بشجعه بالمواطن اللي هو ضعيف فيها.. بس ما بذكر إيجابياته و الأمور اللي بيحسنها.. و كأنو مفروغ من وجودها.. 

ليه نحنا دائما منترصد لأخطاء ولادنا و بس.. و ما منمدح إيجابياتهم ؟ يعني كلمة مدح صغيرة لأشياء جيدة تعودناها من ولادنا لدرجة ما عدنا شفناها.. أكيد بتعمل فرق

و ولادنا رح تتحسن فيهم كتير أمور لو منسمعهم هالكلمة..

صرت حاول زوّد بكلامي كلمات تفرحهم و تمدح إيجابياتهم

و اللي لاحظتو انهم بيحبو يأكدو على مدحي بإظهار المزيد من الإيجابيات.. 

متل لما نقول لشخص انت ذكي !! بيشد ظهره و بيعطينا نظرة الثقة بالنفس 😌 و بيبدا
يحكي أكتر عن مواقفه الذكية

شربنا قهوة العصر اليوم على البلكونة بما انو خافة حدة الاشتباكات 

كرم قاعد عالطرف و عم يعد السيارات الحمر.. سمع الجارة عم تنادي لابنها.. " يا فلااان يا حيوااان.." هيك بالصوت العالي قدام الناس 

صار كرم يضحك.. و بعدها صار ينادي لابن عمو بنفس اللفظ!! 

" شووو قلت يا كرم.. 😱😳 شو عملت.. بسرعة تعال لتغسل تمك.. لانك قلت كلمة ملوثة.. "

يمكن هالطريقة بمناداة الأطفال مألوفة ببلدنا و مسموعة بكتير أماكن.. بس أنا بدي حاول ابعد ولادي عنها بقد ما بقدر

أي إصغاء و طاعة رح ناخدهم من ولادنا لو حاكيناهم بعدم احترام ؟ 

شو شكل المجتمع اللي أفراده بينادو لبعض بهالمسميات ؟ 

شو ممكن هذّب بولادي لو كان لساني مو مهذب ..

تذكرت الحديث " ليس المؤمن بالفاحش و لا البذيء." هاد خياري و عليه بدي ربي ولادي..

من جديد.. خبرني أيمن انو معاملة هجرتنا لكندا ماشية بشكل جيد.. و يمكن قريبا نبدا نتجهز بعد اكتر من سنة انتظار و انو قرر يخبر أهله حتى ما يصدمهم بالخبر لما يصير وقت السفر..

خبرهم...

و من يومها حسيت سلفتي كرهتني أكتر 😢 لأني بقيت ساكتة و مخبية كل هالوقت.. 

و زعلت لما سمعتها عم تحكي عني لوالدتها كلام ما بحب اسمعه.. حكت معها من تلفون المطبخ و ما انتبهت انو الصوت مسموع لغرفتي القريبة منو

ما بتكفينا مشاكلنا ؟ 

ما بيكفينا النار اللي شاعلة ببلدنا..؟ 

و الغلا و الخطف و التشرد و السرقة و الكرب ؟ 

كمان بدنا نزيدها بإنا ما نتمنى الخير لبعضنا؟ و نفتش على مشاكل صغيرة تشغلنا عن أمور أولى بالاهتمام ..؟

لما نشوف نعمة على غيرنا منقدر نقول وحدة من كلمتين.. 

يا أما كيف و ليه و من وين جابوها

يا أما منقول الله يباركلهم و يهنيهم و يكرمنا متل ما أكرمهم..

 .......و بنتي بقدر ضل عم قلها يا كسولة و يا 

و بقدر بقلها يا مرتبة يا حنونة يا رفيقتي الحلوة..

و ابني بقدر ناديلو " يا غبي.." 

و بقدر ناديلو يا شاطر يا حبيب ماما..

 ..لكن أكيد مو كل النتائج متل بعضها

و أكيد.. كلمة صغيرة.. بتعمل فرق كبير ..

 ...يتبع