فقرة جسمي السليم
موضوعنا اليوم موضوع شيق رح يكون للأمهات وأطفالهن
رح نحكي هالأسبوع عن الهرم الغذائي
ماهو الهرم الغذائي؟
يتكون الهرم من المجموعات الغذائية الخمسة التي يجب على الشخص الالتزام بها خلال يوميه ليتمتع بيوم صحي
المجموعات من الأعلى للأسفل:
المجموعة الأولى: قمة الهرم تشير إلى مجموعة الدهون والحلويات وهي المجموعة الاقل
المجموعة الثانية: مجموعة الألبان والأجبان
المجموعة الثالثة: البروتينات
المجموعة الرابعة: الخضراوات
المجموعة الخامسة: النشويات
كيف ممكن نعلم أطفالنا عن الهرم الغذائي وكيف ممكن نساعد طفلنا يختار أكله بطريقة عملية وواقعية ومسلية سواء كان مثالي او صاحب سمنة او طفل نحيف ؟
بالصورة أدناه بتاني صورة في بوستر بوضح الهرم الغذائي الصحي رح نشرح لطفلنا التالي:
إذا كان عندك بيت أو بناية من المكعبات لازم نعمل قاعدة وقاعدة الطعام الصحي هي المجموعة السفلية يعني مجموعة النشويات النشويات هي اللي بتعطي الجسم طاقة مشان يتحرك ومشان ينط ويلعب بس بنفس الوقت النشويات لازم تكون بطريقة صحية يعني سندويشة جبنة او سندويشة ماما بتعملها بالبيت مو سندويشة ماكدونلز
بعدين بنطلع بالهرم او البناية وبنعمل الطابق التاني الطابق الملون وهو شقتين مقسوم لمجموعتين الفواكة و الخضراوات ..بدنا نقول لطفلنا الأمور أنه هدول المجموعتين هنن اللي بيعطونا الفيتامينات والمعادن المهمة اللي بتخلي وجهنا أحمر ومليان نشاط وحيوية وبتعطينا سكريات طبيعية للطاقة وبتقوي مناعتنا وبتجنبنا كتير أمراض
بعد هيك بنطلع عالطابق التالت وهو طابق المنتجات الحيوانية ومنقسم لقسم لمنتجات الالبان والاجبان وقسم البروتينات متل اللحمة والدجاج والسمك والبيض
وبالأخير بنطلع عالطابق الاخير وهو طابق صغير وطابق عالي وما بدنا نوجع رجلينا ونطلع عليه لانه مليان دهون وحلويات وسكريات بس بنقدر نطلع عليه مرة بالأسبوع
والبناية ما بتنبى بدون كل الطوابق وهيك الجسم لازم ينبنى من كل المجموعات مشان يكون صحي والعقل السليم في الجسم السليم
نقطة مهمة انه الهرم الغذائي اتجاهه من الأسفل للأعلى وليس العكس من ضمن التطبيقات والصور على الطفل أن يكتب الاتجاه الصحيح للهرم
كيف ممكن انطبق النشاطات مع اطفالنا؟
ممكن نطبع الهرم لاطفالنا ونعلقه بغرفتهم ونخليهم كل يوم يراقبو هل اكلو من كل المجموعات بطريقة صحيحة؟ ولا قضينا اليوم كله على باستا وبيتزا وما اكلنا من الطابق الثاني والتالت؟
ممكن نخليهم يعبو الصورة التالتة ويلونوها ويكتبو ويرسمو المعلومات الصحيحة
والجدول الرابع كمان نفس الفكرة مقسم على أيام الأسبوع مشان يراقب الطفل استهلاكه الغذائي خلال الأسبوع
بتمنى تنبسطو بالموضوع ويحبوه اطفالكم وتكون طريقة مسلية ليتعرفو فيها عالمجموعات الخمسة
ويراقبوها صح وما ننسى ابدا النشاطات الحركية
خديجة الخالد
