يومي الأول في المدرسة
يوم طفلك الأول في المدرسة اتأكدي انو حيكون تحدي كبير كتير لقلك ولطفلك .. انت اول مرة حتبعدي عن طفلك فترة من الزمن و طفلك رح يكون بمكان كتير كتير جديد عليه ورح يستوحش ويشعر بالغربة ..
حتى نتفادى مصاعب أول يوم بالمدرسة رح اتطرق لبعض النقاط يلي بتساعد طفلك لاجتياز هاليوم الحلو والصعب بنفس الوقت ..
قبل دوام المدرسة لازم تكون القصة اليومية قبل النوم هي عن المدرسة والطفل الكبير يلي بروح عالمدرسة والمدرسة فيها كتير شغلات حلوة رح تسعدنا ...
أنشطة منزلية كتير بتساعد حتى الطفل يدخل شوي لعالم المدرسة بتحببه بالمدرسة وبتشجعو والأنشطة كلا موجودة على موقعنا www.walaadarkal.com
لعبة المدرسة بالبيت .. لعبة جدا مهمة وبتساعد الطفل انو يعرف شو بدو يصير بالمدرسة .. يلا تعا نتخيل انا المس وانت الطالب يلا بلش الدرس هاد صوت الجرس .. وهيك منطلب نروح عالحمام .. وبوقت الأكل هيك مناكل وهيك منضف مكانا .. طيب بالفرصة شو منعمل كيف منلعب مع الأولاد .. طيب اتخيل حدا عم يركض و وقعك شو بتعمل ؟
زيارة المدرسة مع طفلك وشرحك لكل مكان بالمدرسة لشو .. مو بس الصف.. الطفل أحيانا بخاف من هالبناء الكبير والضخم .. لازم اشرحله وورجيه الأقسام .. هالشي بيعطيه راحة نفسية ..
خلي يختار هو غراضه حسب هو شو بحب الشنتة ولونها وكل أشيائه ..
ورجيه صورك بالمدرسة انت وصغيرة واحكيلو كل شي حلو عنك بالمدرسة ..
إذا حسيتي طفلك معلق فيكي كتير وما عم يقتنع بالبعد عنك .. فخلي صورتك معه قليلو كل ما بتشتقلي شوفا .. أو اكتبي اسمك على أيدو من جوا وقليلو هي اسمي على ايدك وانا رح اكتب اسمك .. ممكن تكتبيلو رسالة وترسميلو رسمة حلوة وطبعا بوجوده وخلي يختار العطر يلي بحبه عليكي ليعطر الورقة ..
علمي طفلك عالوقت وخلي يعرف أي ساعة بروح واي ساعة بيرجع .. إذا كتير طفلك بيبكي اول يوم خلي معه منبه يرن وقت الانصراف وهيك طفلك رح ينشغل بالمنبه بدل البكاء ..
ماتقابلي بكاء طفلك بحب زايد وتعلق و دموع ههه بوسيه وقليله بحبك ولاني بحبك بدي ياك تروح عالمدرسة وغيري الموضوع .. وقليلو شكرا لأنك رح تروح عالمدرسة.. احكي اي شي هو وعم يبكي بعيدا عن موضوع الاشتياق .. واعرفي تماما انو ابنك بيقوى فيكي .. إذا أنت كنت قوية وورجيتيه انو الموضوع طبيعي عندك رح يكون طبيعي عنده ..
ابدا ما تحكي شي غير صح لطفلك .. انا بجي باخدك أو شوي وبرجعوك أو مثلا في سباحة هونيك .. لاتخليه يفقد الثقة فيكي ..
الصح انو طفلك يداوم اول يوم ساعتين وبعدا كل يوم بزيد ساعة .. وابدا مو صح مرافقتك قله بالصف إذا الهدف انو ما يبكي ..
ممكن تاخدي صورة للمس مع طفلك وتطبعيها وتخليها بالبيت حتى طفلك دايما يتشجع ودايما احكي كلام حلو عن المس تبعه ..
مالي كتير مع الهدايا والجوائز لأنه راح عالمدرسة .. طبيعي يروح وطبيعي ما يبكي .. وهيك حركات رح تحسسه انو عم يعمل شي غير عادي ههه
ماتقارني بغيره من الأطفال ابدا لا سلباً ولا إيجاباً
خلي يجهز أكله بإيده ..
بطاقات صغيرة لأصدقائه بتساعد انو طفلك ينسجم مع رفقاته الجداد
اتذكري الهدوء النفسي بالبيت والاستقرار جدا بساعد انو كل شي يمرق بسلام ان شاء الله ..
الله يحميهن ويوفقن ويسعدن ونشوفن بأعلى المراتب يارب ..
