مبارح كنت عم اتناقش انا و صديقة و سألتني سؤال حلو كتير خلاني قول ليش لأ و نتج عنه موضوع دردشتنا لليوم ، طبعاً لح تتسائلوا شو هالسؤال ، السؤال كان :
شلون فيني اعمل ديكور لغرفة طفلي يكون زينة و تعليمي بنفس الوقت ؟ شي استفيد منه يعني ....
ليش ما نعمل شي يكون حلو و تعليمي بنفس الوقت بحيث نحضر الاطفال الي صار وقت ذهابون للمدرسة و نوسع فيه افاق و مدركات اطفالنا الاكبر بالعمر بحيث ما يتقيدوا بس بالموجود بالكتب من معلومات ، و ينمي عندون حس الابداع.
هناك عدة افكار فينا نطبقها سوى على جدران غرفة الطفل او نستعين فيها لاضافة عنصر جمالي و تعليمي لاطفالنا
خلونا نبلش بتخصيص جدار واحد من غرفة طفلنا و نسميه مثلاً " جدار معلوماتي " هاد الجدار منزينه بطريقة تعليمية
١- فينا نقص كرتونة على شكل احرف ابجدية ( عربي كان او اجنبي ) و نزينها بطريقة تناسب الوان غرفة الطفل و علقون علجدار حسب ما بشوف بيناسب ، و جنب كل حرف كلمة تناسبه ، الفكرة انه ما نعمل الاحرف كلها بوقت واحد المتعة لما نعمل كل يوم او بلاسبوع مرة ( حسب الوقت يلي بتختاريه ) حرف و نخلي اليوم كله يتحدث عن هذا الحرف : بعلق جنب الحرف الحيوان الذي يبدأ اسمه بهذا الحرف ، و من ثم اختار كلمة تبدأ بهذا الحرف و نمضي كل اليوم نتحدث عن هذا الحرف . و من هون لاخر المدة يلي حددتيها لح تكون الاحرف الابجدية تثبتت عند الطفل بشكل فظيع .
٢- نفس المبدأ فينا نعمله على ارقام بس بضيف اذا كان عمر اطفالك يسمح للمعادلات الرياضية من جمع وطرح و ضرب فبنصح بتعليق معادلة كاملة بطريقة فنية
٣- للاطفال الكبار ممكن ناخذ من نت خريطة العالم مخصوصة للاطفال فيها معلومات عن كل بلد و نعلقها على هذا الجدار و نعلق جنبها لوحة فارغة بحيث الطفل كل ما دخل غرفته شاهد الخريطة و حفظ معلومات عن كل بلد و نطلب من الطفل اخراج من النت صورة عن معلم اساسي من معالم البلد و لصقه على اللوح الفارغ حتى يمتلئ الوح بالكامل .
٤- و للاطفال يلي بحبوا السيارات فينا نعلق صور عن طرق المواصلات مع اسم كل طريقة مواصلات بطريقة تشد الطفل ، مع اشارات المرور بحيث يحفظ اشارات المرور الموجودة في الشارع .
٥- فينا نعلق ايطار صورة و نضع صورة مثلاً للقلب و كتب تحتها معلومات عن القلب و نخلي الطفل يقراها ولو مرة واحدة و كل فترة نغير الصورة الموجودة داخل البرواظ لصورة جديدة مع معلومات جديدة ، طبعاً الصورة لازم تكون تناسب المرحلة العمرية للطفل .
و بالنهاية للاطفال من مرحلة kg الى صف الاول يوجد اشياء تزينيية و تعليمية بنفس الوقت يمكننا الاستفادة منها مثال :
- فينا نضع بالغرفة سجادة ارقام او احرف و نطلب من الطفل اللعب فيها مع ذكر الاحرف او ارقام بصوت عالي
- توجد ارضيات اسفنجية تعليمية مثل puzzel ممكن طلب من طفل تركيبها مع ذكر الاحرف بصوت عالي .
وقتي معكم خلص للاسف ، في حال عجبتكم الافكار و نفذتوا شي منها بتمنى شوف صور مشاركتكم مع اطفالكم
و اكيد يلي عندها اي استفسار عن هذا المقال ياريت تكتبه بالتعليقات ولا تردد ، و باذن الله بحاول جاوب عليه باقرب وقت ممكن .
للامانة العلمية تم الاستعانة بصور من نت لتوضيح الافكار المطروحة .
لكم مني كل الحب و الاحترام .
كانت معكم ربا الخاني .
