بمحاولة لطيفة من أخي وائل لتلطيف المحنة على ولادي
زارنا اليوم الصبح ببيت أهلي و جايب معه ألعاب جديدة لولادي..
باربي و دفاتر رسم لغزل..
و طيارات لكرم..
و مكعبات لحلا..
غزل فرحت بهديتها كتير..
بس كرم..
جمع الطيارات و حطهم جنب باب البيت..
سكت.. بعدها قلي..
" أنا ما بحب الطيارات .. ما بدي صير طيار.. الطيارة مخيفة بتكسر البيوت
"
بكي.. ضميته..
" يا حبيبي انت رح تصير طيار تساعد الناس يسافرو لأماكن حلوة.. ما رح تكون طيار بيكسر البيوت .. "
شكرت اخي بابتسامة متعبة.. مو قادرة جامل..
عم استقبل اتصالات من رفقاتي و أقربائي.. و عم اعتذر عنها..
اتصلت فيي رفيقتي لينا.. يلي آنستني ببعدي السابق عن بيتي.. كمان ما قدرت حاكيها..
مر أسبوع و أنا معتزلة الكل.. ساكتة و مو قادرة اتصور شو صار..
غزل مستوحشة..
" ماما.. ما رح نعمل أسبوع مميز؟ "
شو قول..؟ ليه في أسبوع مميز أكتر من هيك!!
دخلت للغرفة و سكرت على حالي الباب..
بعد شوي بينفتح الباب بسرعة..
بلاقي قدامي لينا ..!!
منفعلة و مندفعة و عم تحاكيني بصوت عالي !
" ريحان ..!! و بعدين معك ؟!! رح تبقي حابسة حالك و مستسلمة !!
انت لا أول و لا آخر وحدة خسرت بيتها..
ما انا متلك.. و حاسة فيكي.. بس الاستسلام مو حل
انتي سند أهلك و ولادك.. شدي حيلك و كل شي بيتعوض..
قومي معي.. ما في وقت للكآبة..
قومي لبسي تيابك بدنا ننزل عالسوق !! "
خلتني البس غصب عني..
و نزلت معها عالسوق نشتري كم غرض ناقصين.. و أكيد بعد هالنزوح ناقصنا كتير..
مشيت معي من محل لمحل.. طالعتني شوي من القفص اللي حبست حالي فيه..
شفت عيلة بالطريق .. ناصبة خيمة من المفارش بين شجرتين..
خف عليي حملي.. الحمد لله عالأقل لسه نحنا عايشين تحت سقف..
بالمواصلات.. بطريق الرجعة..
قعدت مقابلنا ست كبيرة و بجنبها زوجها.. رجال نحيل كتير و عيونو مهمومة..
يبدو انو مشوارها بالسوق كان طويل و متعب..
عم تجمع أنفاسها.. و تشد ربطة حجابها.. و تمسح قطرات عرقها بمنديل
زوجها عم يعاتبها عالفلوس يلي صرفتها بالسوق
ـ " تأكدي من محفظتك يكون واقع منها شي..! عطيتك خمسين ألف ليرة وين راحو؟! "
فردت أصابعها و صارت تحسبله..
ـ " عد شو صرفت..
25000 فواتير
5000 لطبيب الأسنان
10000 ملابس داخلية للولاد
4000 خضار للطبخ
5000 اجرة تصليح البراد
و لسه ما اشترينا لحمة و لا زيت..! "
ـ " لاحول ولا قوة إلا بالله.. كيف بدنا ندبر أمورنا ؟
عم فكر بيع الدفاية .! "
تلفتت لعنده بتعجب.." تبيع الدفاية !! و على شو بدنا نتدفى بالشتا ؟ "
ـ " على دفاية الكهربا.. "
بتعحب أكبر.." كهربا !!! مو ليكون في كهربا بالأول !! "
وصلنا للبيت.. و تركنا هالحديث يلي صاير حديث أغلب الناس.. الارتفاع المخيف للأسعار يلي عم يتناسب عكسا مع الراتب و مع كرامة الإنسان بهالبلد..
وقفت لينا جنبي و قالت..
" متل ما شفتي.. كانت الهموم من زمان مخباية جوا البيوت.. و هلأ عم نشوفها مفروشة عالطرقات متل ما شفتي..
ريحان.. المحنة نازلة على راس الكل.. لو منستسلم منزيدها أكتر..
في جيل ناطر ينسند علينا ليصلح جنون الكبار يلي سبقوه..
و في واجب و مسؤولية و مهمة بدنا نأديها لربنا..
ما رح قلك ابتسمي و تفاءلي و أشرقي و احكيلك مثاليات.. ازعلي و صبي همك عالأرض بدمعتين.. بس قومي قوية.. بساندك و بتسانديني لنكمل هالعمر على خير..
و عالأقل.. نقدر نربي ولادنا و نحميهم من هالقبح يلي مغيم على سمانا.. "
ـ" معك حق ..
كرمال ولادنا..
بس.. كرمال ولادنا.. "
يتبع...