عنواننا الحالي .. بيت أهل زوجي.. غرفة وحدة فيه الي و لزوجي و أولادنا التلاتة
غرفة تانية لأخوه "مهند" و زوجته " أماني " و ابنهم و بنتهم الرضيعة..
اخته الجامعية "علا" و والده و والدته..
ما كانت مشكلتي ضيق المكان و حشرنا نحنا الخمسة بغرفة وحدة.. بقدر ما كانت مشكلتي التدخل بتعاملي مع ولادي.. و حاجتي للخصوصية و الانعزال أحياناً
فكرة استئجار بيت كانت بعيدة عن ذهننا
بسبب مشروعنا بالسفر لكندا يلي لسه ما خبرنا فيه حدا
و بسبب انو أيمن خسر شغله و عم يستعيد وقوفه من جديد.. أقل بيت قابل للسكن بقلب الشام اجاره مو اقل من خمسين ألف ليرة و لازم ندفع ست شهور مقدما
مهند و أماني موجودين معنا لنفس السبب.. و ما استأجروا بيت كمان لنفس السبب..
أماني بتصغرني بسبع سنين
ما عندي معها أي مشاكل.. بس للأسف ما قدرت انسجم معها و لا نكون أصدقاء.. التفكير و الشخصية و الميول مختلفة كتير بيناتنا..
ما بعرف ليه هية بتحس انو نحنا ببرنامج مسابقات قدام لجنة تحكيم يلي بتكون " عمي و حماتي" 😕
بتحاول دائما تثبت صحة طريقتها بتربية ولادها.. باختياراتها.. بأسلوب حياتها.. حتى بطبخها و أعمالها المنزلية..
مهووسة داائما بالسفر لكندا
و بإثبات انها دائما على صواب..
سلمت عليي اليوم الصبح و قالتلي
" ريحان أنا نازلة عالسوق بدي جيب كم غرض خايفة ما لاقي منهم بكندا و بدي مر على محل اخي آخد من عندو شوية مكياجات.. عنده تشكيلة جديدة.. تروحي معي؟ "
كرم سمع كلمة تروحي معي و بدا يشدني من تيابي و يقلي ماما ماما بدي روح معك
اعتذرت منها و تجاهلت كرم يلي قعد بالأرض و فتح إذاعة النق و البكاء
بتستكمل كلامها و بتقول..
" على فكرة ريحان.. انتي كتير متساهلة مع ولادك
هيك رح يعذبوكي.. انا محلك بكف صغير بعرف أدبه "
تجاهلت كلامها و نزلت لجنب كرم و تطلعت بعيونه و قلتله " ماما منروح العصر مع خالة لينا للحديقة.. أما هلأ ما فيي روح "
تركتني و راحت لمشوارها..
بيقولو.. التجاهل دوا لكل علاقة ما فيها تفاهم.. و انا غالبا بتجاهل ليبقى راسي مرتاح.. لكن أحيانا بعض المواقف بتكون مستفزة ما فينا نعديها بدون ردة فعل..
سمعتها مرة عم تحكي عني مع حماتي على بلكون المطبخ.. ما انتبهولي لما دخلت.. و لا سمعت الحديث كله.. بس كان واضح انها عم تشتكي من شي شافته مني..
تجاهلتها مرة.. و مرتين.. و تلاتة..
بعدها صار عندي فضول اعرف شو عم تحكي لحماتي عني؟؟
مرة سمعتها بنتي غزل.. عم تخبر حماتي عن انو غزل فتحت خزانة حماتي بطلب مني.. بدون إذن..!!!
بتذكر من زمان لما غزل حاولت تنقللي كلام انحكى عني.. و منعتها... رفضت اسمعها.. حتى ما تتعود تكون " نمامة" و تتعود على نقل الحكي..
بس هالمرة ما قدرت
شغلني الفضول لأعرف شو عم ينحكى من ورايي.. سمعت من غزل.. و قلتلها هالمرة سماح.. بس ما بيصير نتجسس عالآخرين..
" ماما انا ما تجسست.. صوتهم كان مسموع "
" و انتي ليه تفتحي خزانة تيتة؟؟ "
" ماما انا خبيت الشوكولا يلي اشتريتها عندها.. لما حطها بالبراد عم ارجع و ما لاقيها
"
" تاني مرة قوليلي .. و انا بخبيلك غراضك.. ما منفتح خزانة حدا بدون إذن.. "
بعد شوي.. اخدت ولادي و نزلنا نمشي بالحديقة القريبة..
مو من عادتي اطلع من البيت كل يوم..
بس بعد وجودي هون.. صارت هالطلعة اليومية متنفس.. و ابتعاد شوي عن جو البيت..
في أشخاص بينفرضو بحياتنا و مو دائما منملك خيار البعد عنهم.. بس يمكن منملك خيار إنا ما نخليهم يسيطرو عليها.. . نقدر نبقى متحكمين و متوازنين لأقصى حد ممكن..
يتبع..