مذكرات عائلة 2 " 13 " اختفاء

صدق المتل يلي بيقول " قاضي الولاد شنق حاله " 

😖😫

كانت مكفيتني مشاجرات ولادي مع بعض.. هلأ صار عندي فوقها مشاجراتهم مع ابن عمهم.. كرم بالذات صاير سريع الغضب بعد ما تركنا البيت.. ما عم يتحمل تصرفات ابن عمو ببساطة.. كل النهار و نحنا عم نفض اشتباكات بينهم و " ماما هو اخدلي لعبتي و كسرها.. لأ مو صحيح انا اخدتها مكسورة.. و اليوم دوري بالفيلم.. لأ دوره.. و هكذا" 

مشاجراتهم أمر طبيعي كتير.. 

بس لما نكون نحنا تعبانين من داخلنا.. و جواتنا مشاجرات من نوع تاني.. بيصير الوضع مستفز و بيصير صوت الحكي مزعج و كأنو ملخص جواتو كل أصوات الضجيج و الصراخ و الإزعاج

بهيك وقت لما حس انو نفد صبري و طاقتي.. أحياناً بنزل بمشي حول البيت شي عشر دقايق.. بتخلص من أنفاس التوتر و برجع..هاد طبعا لو كانت حلا نايمة.. أو بحاول انشغل بشي تاني.. 

غسلت وجهي.. و عم شوف بالمراية شحوبه اللي عم ينكشف من تحت أصابعي المبللة.. 

ليه هيك؟ مبينة أكبر من عمري بعشر سنين.. 

😢

لبست و نزلت اتمشى.. مريت بجنب محل ماكياجات.. ألوان مفرفحة 

💗

 و روايح بتنعش القلب.. 

😃

استحليت اشتري أنينة بارفان صغيرة.. قلم كحل.. و قلم حمرة.. 

💄

 و مكياجات بسيطة.. 

اخدتهم و طلعت.. وقفت شوي.. عم شوفهم جوا الكيس.. و قول لشو؟ 

لمين الكحل و الحمرة؟ هلأ وقتهم و نحنا خسرانين خسارة العمر؟ 

ما بعرف.. 

ما اخدت العطر لمجرد العطر.. بس لمجرد اني اتذكر الحياة الطبيعية.. اني اتمسك بأطراف أصابعي بتفاصيل بتذكرني بحياتي الطبيعية.. 

تفاصيل صغيرة منخفي فيها خوفنا و قلقنا.. منخبي وراها وجهنا المتعب.. و منحاول نظهر الوجه الطبيعي 

طلعت عالبيت و شافت أماني الكيس بإيدي 

توسعت عيونها 

😳

 و نظرتلي بعتب.. " هيك يا ريحان؟ مو قلتلك اخي عندو محل مكياجات؟ مبارح كنت عندو.. الله يسامحك ليه ما وصيتيني؟ كنت جبتلك ياهن بنص سعر هدول" 

😏

ابتسمت ببرود و قلتلها.. " نسيت.. غير مرة" 

حماتي مرت جنبنا و قالتلي " الله يرضى عليكي ريحان.. زوجك لسه عم يعوض خسارته.." 

قطعت الحديث و اعتذرت منها و دخلت لغرفتي.. 

ما حدا بيشوف الصورة إلا من زاويته.. 

و انا المحشورة بزاويتي حبيت اعمل شي بحبو.. شي يسليني.. طالما ما عم ضر حدا.. 

مو من حقنا نحنا يلي محبوسين بهالكابوس الكبير نسرق لحظة ممتعة؟؟ نخليه يختفي من قدامنا ولو دقايق.؟ 

رن تلفوني.. ماما عم تتصل.. صوتها عم يرجف و انفاسها مسموعة.. " ريحان.. يا امي.. اتصلي بأخوكي وائل.. عم نتصل فيه من اربع ساعات و الخط مغلق.. رفقاتو ما شافوه.. و بالشغل عم يسألو عنو.. قلبي متل النار يا امي 

😢

" 

شعل قلبي نار انا كمان!! و اتصلت خمسين مرة بدون جواب 

انقر عالموبايل بأصابعي نقرات سريعة متوترة

و بدت الأفكار البشعة تنط براسي متل ولاد مزعجين.. 

ليكون صرلو شي.. انصاب برصاصة قناص؟ معقول نزلت جنبو قذيفة؟ و لا انخطف؟ طب الخاطف بيطلب فدية.. نحنا ما وصلنا خبر شي.. اتصلت بأيمن يلحقني.. و ركضت لبرا و ترجيت سلفي ينزل يسأل عنه بالمستشفيات و الفروع.. 

كلما مضت ساعة بدون خبر يزيد خوفي و دقات قلبي 

لف و دور بالبيت و عيد الاتصال فيه.. 

بسمع صراخ ابن سلفي الصغير.. ضربو كرم و تخانقو 

دخلت عليهم بشكل هجومي.. و صرت اضرب كرم بإيديي التنين و اصرخ فيه و قلو كمممم مرررررة نبهتك ماااا تضربو.. مااا تضربو 

اصرخ فيه و ابكي اكتر منو

اي.. 

ضربتو.. 

:(

 

انا يلي عم ادعي دائما اني ام مختلفة.. 

ضربتو.. 

:(

 

و انا أكتر أم بتكره الضرب.. و شكلها قدام الناس شكل الأم الناضجة الحكيمة.. 

ضربتو.. و بإيدتين.. 

ضربتو و فرغت كل قلقي و خوفي فيه.. 

اخدتو حماتي مني و صارت تقلي حرام عليكي طفل شو ذنبو.؟ 

دخلت لغرفتي و بكيت بكيت.. رح تصير الساعة 10 و ما في عن أخي خبر..!! 

بعد شوي اجانا خبر الرحمة.. لقاه أيمن معتقل بأحد الفروع.. و أطلقو سراحو.. كان مجرد تشابه أسماء..! 

اخدو وقت لحتى تأكدو.. وقت كان كافي ليشعل قلوبنا نار و يقلب ساعاتنا جحيم.. 

رحنا لبيت اهلي و ضميت اخي و تأكدت انو سليم و لله الحمد.. 

تطمنت عليه و رجعنا.. لقيت كرم نايم و البيت هادي.. 

بستو على خده و جبينه و هو نايم متل الملاك.. زعلت من حالي عالقتلة يلي طعميتو ياها 

😔

و فكرت بيومي يلي ناطرتو بعد الليل.. كيف رح طيب خاطره و فرحه بيوم جديد.. 

منمر بمواقف صعبة.. بتطالع أسوأ ما فينا.. 

بتخلينا نتصرف بدون حكمة و اتزان.. 

تصرفات كلنا منتعرض لفعلها.. 

عادي انا نغلط مرة.. بس الأهم ما يتحول هالخطأ لعادة.. و صفة تلازم شخصياتنا.. 

يتبع.

.