مذكرات عائلة ٢ (٣)

 مذكرات عائلة 2    . 3 . 

ماما..  سبحان اللي وهبها هالنفسية الهنية.. اللي بتكبّر الفرح مهما كان صغير.. و بتصغّر الهم مهما كان كبير .. 

بجي لعندها و حاملة همي متل جبل.. بتحوله بنظري متل كمشة تراب.. بتنثرها لبعيد ليتبدد تقلها بعيوني .. 

وصلنا لعندها عالبيت بعد هالرعبة خايفين و دبلانين.. تضحك للولاد و تمازحهم و تلاعبهم

بعد شوي.. 

أثناء لعب الولاد.. بتاخدني لغرفة تانية.. و بتهمسلي.. 

" ريحان.. يا بنتي.. هالبلد يا ما مر عليها أشكال و ألوان.. مر عليها مفسدين طالعو فيها كل الفساد اللي جواتهم.. 

نهبوها و قصفوها و وجعوها.. و بالآخر صارت مقبرتهم.. بيرحلو.. و بترجع بتقوم و بتتعافى و بيعمروها ولادها من جديد.. 

ريحانتي.. ولادك بيستمدو قوتهم منك.. بيهون عليهم كل تعب لما يحسو أمهم قوية.. بخوفك.. بيكبر عليهم كل خوف مهما كان صغير.. 

ما رح يصيبنا غير قدرنا.. دنيتنا أيام امتحان.. كلنا تاركينها و راحلين.. انتشلي الفرح بإيديكي حتى لو كان تحت الأنقاض.. 

و ادفني الهم تحت سابع أرض مهما كان كبير.. 

بعرف ممكن نبكي.. و ممكن نزعل.. رح نبقى بشر.. بس ما رح نيأس أبداً.. "

ضربت على كتفي ضربتين صغار و ابتسمت و ضمتني للحضن اللي مهما كبرت.. ببقى فيه طفلة صغيرة.. 

على وقت النوم.. 

غزل متمددة جنبي و مو قادرة تنام.. عيونها سارحة و مفارقها النعس.. 

تلفتت لعندي و سألتني.. :

ـ "  ماما ليش بلاد الأجانب حلوة و ما فيها حروب.. و بلادنا فيها فوضى و مشاكل ؟ مع انو نحنا مسلمين و هنن لا.. " 

ـ "  يا حبيبتي ما دخل انهم مسلمين أو لا.. "

ـ"  كيف يعني؟ "

ـ"  مممم يعني مثلا.. تعالي نتخيل بمدرستك عندك صديقة مو مسلمة.. طول السنة كانت تكتب واجباتها و تدرس و تحفظ و تتمرن كتير.. و وقت الامتحان ما تنشغل باللعب و التلفزيون.. و تجاوب على الأسئلة بشكل جيد.. 

و انتي خلال السنة تكوني مهملة لدروسك و واجباتك.. و مقضية وقتك لعب و تلفزيون و نوم و إهمال..  و وقت الامتحان ما لحقتي تدرسي شي.. بآخر السنة.. مين اللي رح ينجح و يتفوق و ياخد الجائزة ؟ 

البنت الكسولة المسلمة؟ 

و لا البنت الشاطرة اللي مو مسلمة؟ "

ـ"  البنت الشاطرة "

ـ "  إسلامنا يا حبيبتي بيطلب منا دائما نكون شاطرين و مجتهدين و متعاونين.. بس لو نحنا ما نفذنا اللي طلبه منا.. ما رح نفوز و لا ننجح.. وقتها رح نكون.. مسلمين بالاسم و بس "

ـ" ماما طيب شو الفائدة من اني كون مسلمة طالما بقدر كون ناجحة متل رفيقتي اللي ما كانت مسلمة ؟  "

ـ" يا حبيبتي بلاد الأجانب صح ناجحين بأعمالهم.. بس كمان عندهم مشاكل كتير خطيرة.. لو كانو مسلمين ما كانو عانو منها.. عندهم نسبة جرائم كبيرة.. و عندهم عيوب كتير متل اي مجتمع.. 

بس نحنا منشوف عندهم الأشياء اللي ناقصتنا و بس.. 

ناقصنا عدل.. 

ناقصنا نظام.. 

ناقصنا أمان.. 

ناقصنا نظافة.. 

ناقصنا نجاح.. 

لهيك دائما منركز عالأشياء الحلوة اللي موجودة عندهم و مو موجودة عنا

البنت الفقيرة لو دخلت لبيت بنت غنية.. رح تشوف عندها الأشياء اللي ناقصتها.. فساتين حلوين.. و ألعاب كتار

ما رح تشوف الأشياء اللي ما بتنقصها

و هيك كل حدا بيشوف عند غيره.. الشي اللي بيكون ناقصه.. 

بتعرفي؟ 

بوحدة من أكتر البلاد رفاهية و نجاح بالعالم.. تسجل فيها أعلى نسب انتحار .. لأنو مهما كان الإنسان غني و ناجح.. رح يبقى مكان السعادة بقلبه فارغ لو ما عرف مين ربه و لو ما ربط نجاحه برضا ربه.. 

بلاد الأجانب يا حبيبتي.. مر عليها سنين و كانت أحوالها سيئة أكتر بكتير من أحوالنا.. حروووب و قتل و فقر و مرض.. 

و نحنا كمان.. مرت علينا سنين كنا فيها سعداء كتير و أقوياء كتير و ناجحين كتير.. لما كنا مسلمين عن جد ..

غزل حبيبتي..  مهما شفتي المسلمين عملو أشياء مو حلوة.. تأكدي دائما انو الإسلام بريء منها.. 

بريء.. و ما بيقبل فيها أبدا.. "

و هلأ عطيني بوسة من الخدود الحمر و العيون اللي نعست.. و بوسة على جبين البنت الشاطرة المسلمة اللي رح تكون أنجح البنات.. ☺

ضميت بنتي اللي صارت تكبر و تكبر أسئلتها معها.. 

ضمة خلتني انسى تعب نهاري 

يا روح ماما.. ما بعرف مين فينا بحاجة التاني أكتر.. 

نور الاشقر