مذكرات عائلة 25

مذكرات عائلة   . 25 .

رمضان تجلى و ابتسما.. :)

قناديل ورقية صغيرة بأوراق ملونة شاركنا كلنا بتنفيدهن لزينة رمضان هالسنة..
وزعنا المهام..
أنا بقص الورق..
غزل بتخرزهم و بتشكلهم..
و كرم بيرتبهم و بيناولني ياهم لعلقهم
و حلا القطة بتاخد زوايد الورق للمهملات :)

غزل جهزت تياب الصلاة اللي رح تاخدهم معها للتراويح..

و كرم متحمس يصوم لأول مرة..
"ماما.. أنا بدي صوم معكم.. بس يعني ما فيي آكل أبدا ؟  بس حبة شوكولا وحدة ماما..
أو علبة عصير صغيرة.. ما باكل أكتر من هيك.. "
  يا روحي البراءة ما أحلاها..
ابتسمت و قلتلو ..
" بالبداية يا حبيبي بتصوم بالتدريج.. أول كم يوم بتصوم لأذان الظهر.. و بعدها بتحاول تكمل للعصر..
أو فيك تاكل الصبح و تصوم من الظهر للمغرب..
انت بطل و أكيد رح تقدر  "..

تلفتت غزل و سألتني..
"  ماما.. مو نحنا منصوم لحتى نشعر بجوع الفقراء ؟ طيب الفقراء ليه لازم يصومو؟؟  "
ممم سؤال مهم..

"  غزولتي نحنا منصوم مو بس لنشعر بجوع الفقراء و لو انو هالشي يعتبر فائدة من فوائد الصيام..
بس الحقيقة شهر رمضان هو شهر تدريب لنقوي إرادتنا و نتغلب على ضعفنا..
كلنا.. أغنياء أو فقراء..
منصوم طاعة و امتثال لربنا.. لأنا منحبه كتير و هو بيحبنا أكتر و مخبي للصائمين جائزة عظييييمة كتير كتير أحلى من كل شي بيتخيلوه..

لما أطلب منك يا غزل انك تتركي شي هو بالأصل مسموح و حلال بس لأنك بتحبيني و لحتى تسمعي كلامي.. بيصير سهل عليكي تتركي الأشياء الممنوعة أو الضارة..
يعني لما اطلب منك ما تلعبي لمدة ساعتين تساعديني فيهم.. و انتي تقوليلي حاضر يا ماما.. معناها انتي بتحبيني و بتسمعي كلامي و أنا وقتها رح كافئك مكافأة حلوة لأنك بنت محبة و مطيعة..

و الصيام هيك يا حبيبتي..
برمضان منحس بهاد الحب بيننا وبين ربنا..
و منحس بقوة إرادتنا و التزامنا..
منجمع حسنااات كتااار كتااار و منستقبل فيهن فرحة العيد..  "

أسئلة الأطفال بهالعمر بتكتر.. و كل إجابة رح تكون حجر أساس ينبنى بتفكير الطفل و بعقيدته.. لازم نبنيه بإتقان ليكبر و يكبر معه.. و يكون الو سند متين لما يقابل رياح الأفكار بعد ما يكبر..

طل الشهر و طلت معو الفرحة..  صورت كرم و هو عم يفطر أول فطور
فطورنا اليوم ببيت العيلة..
كلنا مجموعين ببيت أهل زوجي.. ضجة و بهجة و ولاد عم تركض و صحن عم نزفه عالسفرة الرمضانية ورا صحن..
و بعدو نازلين تصوير لهالسفرة و صوت طقطقة الصور كأنا بمؤتمر صحفي :/  ...

الله أكبر الله أكبر..  أول إفطار و أول دعوة..
رفعوا ايديكن الصغار ماما و ادعو دائما..
الله بيحب اللي بيناديه دائما و بيطلب من خيراته..
نحنا بحاجة لكرم الله كل يوم و كل ساعة..
رح اتفق أنا وياكم نخلي الدعاء عادة يومية..
كل يوم ندعي ولو دعوة صغيووورة كتير ..
تحسسنا إنا قراب من ربنا دائما..
اتفقنا؟..  اتفقنا :)

كان يومنا حلو.. 
لولا الرعبة اللي أكلناها بآخره..  بعد ما صارت الاشتباكات و المظاهرات و المطاردات بعد التراويح و رجعنا عالبيت ركض..

أيمن خاف علينا و طالع فرمان انو ممنوع انا و الولاد نروح نصلي التروايح بالمسجد مرة تانية..

" معلش ماما.. رح نعمل مسجدنا بالغرفة.. رح مد السجادات بزاوية الصالون و نصلي انا و انتو سوا.. و بعدها في أكلات طيبة كتير و نجوم نلزقهن بلوحة الشاطرين.. " 
ارتسمت البسمة عالشفايف المقلوبة.. :)
و مرقت على خير.. و الله يلطف فينا من شي أعظم..

نورالأشقر